Cancer Hneh Theihna Tura Mu Tan Pawimawh Tak Pakhat Chu Rial Chini (sugar) hi a ni

Thil thlum ei tam lutuk hi a tlangpuiin a thatloh zia kan hre hlawm awm e. Mahse cancer cells te tan an chaw tha tak a ni tih hi kan hre chiang hlawm em. Thlum (sugar) hi chi hrang hrang, Glucose te, Sucrose leh Fructose te zingah hian cancer tana hlauhawm zual chu fructose hi a ni. Fructose han tih hian Mizo chuan rial chini kan tih, (refined sugar) hi a ni. Tun tuma kan article atan chuan chi thlum emaw fructose tiin kan sawi ve mai ang a.

Chi Thlum Hian Cancer A siam Theih Dan:

University leh hmun hrang hranga mi thiam ten an zirnaah chuan thlum ei tam lutuk hian cancer a siam thei tih an hmu. Then khat te chuan, “Chi thlum hi cancer hrik (cells) te chaw tha tak a ni,” ti a sawi mek te pawh an awm a. Cancer cells hi thur, acid tamna (environment) ah hian an pung chak a, thlum ei tam hian taksaah thur (acid) a siam tam thei tlat mai a ni. A chhan chu thlum kan ei reng reng hi taksa in a hman tangkai theih nan chemical reaction tam tak kal tlangin a lo buatsaih a. (food metabolism ) Chuta tanga lo chhuak (byproduct) chu thur, lactic acid a siam a ni. Thlum kan ei tam chuan taksaah thur a tam dawn ta a ni. Chutiang kawng chuan thlum ei tam hian cancer a vulh lian thei. Mi thiam te lo hriat tawhna atangin mitin hian cancer kan pai vek a, upat lamah emaw taksa a lo chakloha natna hrik do theihna a lo chauh hunah cancer cells te chu an lo pung thuai a, cancer kan lo vei ta thin a ni.

Thlum (fructose) hian cancer cells te a vulh pun dan mi thiam te zirnaa an hmuh kawng dang leh chu, “Cancer cells te hian thlum abik takin fructose hi cell( timur) laimu nucleic acid siam nan hian awlsam takin an hmang thei a, tichuan cancer te chu a tipung (proliferate) chak ta em em a ni,” an ti bawk.

University leh hmun hrang hranga an zirnaa an hmuh chhuah then khat te chu thlum tam tak ei hian heng thil tha lo te hi a thlen thei:-

1. Kan cell te insiam dan a ti danglam thei.

2. Free radical an tih oxidation vanga lo awm hi a ti pung thei. Hei hi a lo awm theih dan chu thlum kan han ei hian kan taksaa oxygen nen a han inpawlh kha oxidation a lo awm a. Chu chuan free radicals a siam thin a ni. Kan han sawi fo tawh thin angin free radical hi cancer siam theitu hlauhawm tak a ni..

3. DNA a tichhia. DNA (Deoxyribonucleic acid) kan ze laimu ber a khawih chhe thei.

4. Thil pun, hliam, inflammation a siam thei.

5. Thisena triglycerides a ti sang thei. Hei hi lungna thlentu bul ber a ni. Thlum chi dang glucose te hi chu (kan chawei Carbohydrates) kan ei te hi kan thisenah (bloodstream) lut nghalin chakna (energy) siam nan hman a ni a, fructose erawh chu thin (liver) a process a ni a. He thlum hi tamtak kan ei chuan kan thin khan a process thei lo va, thau thalo triglycerides an tih ang kan lo nei tam ta thin a ni. Chu chuan lungna a siam thei.

6. Zunthlum a thlen thei bawk.

Thlum (fructose) hi kan nitin chawah leh thil eiah hian a tam viau mai thei a ni. Theirah thlumah tepawh hian a awm a, mahse thei rah thlumah chuan fructose hi a tlem a, taksa tan a hlauhawm tham vak lo tih a ni. Soda chi hrang hrang diet soda tiamin a tam em em a ni. Soda bur khatah hian chi thlum hi thirfiante (teaspoon) 10 vel a awm a ni. Tin, processed food an tih, thei tinah te hian an tam a, fimkhur a ngai hle. Thlum hi a tlem thei ang bera kan ei a pawimawh hle. Mi hrisel pangngai tan chuan ni khatah 25grams aia tam lo ei a tha. Cancer vei tan chuan ni khatah 10grams vel a tawk. (Thirfiante (teaspoon) khatah hian gram 7 vel a awm) Hei hi kan thei ei atangte, ice cream, cake, soda, thei tui kan in leh ei te hi chhiar tel tur a ni.

Kan article tih tawp nan hian Dr. Don Colbert MD lehkhabu, ‘The Bible Cure for Cancer’ tih bu a cancer veite tana a ziah hian han khar ila. “In thinlung chhungril taka in thlarau nun in enfiah ula Pathianin kan eitura chaw tha tak tak a lo duan te hi ngaisangin hmang tangkai ngei ila. A Biblle thianghlima damna min tiam te hi ring ngam turin nitina chakna dila tawngtai rengin awm ila.. Taksa ti chak turin rilru hrisel a pawimawh a, chung atan chuan thil thenkhat han tar lang ila.

1. I inhumhimna kulhpui turin Pathian thu hmang fo rawh. Pathian thu hian huatna te, ngaihdam theihlohna te keimahni sual awm reng reng a hneh thei.

2. Pathian hnenah englai pawhin lawm thu sawi reng rawh. Mitin hian chaw kan ei dawnin tawngtaiin lawm thu kan sawi thin. Kan chawah te hian kan taksa tana tha lo tur thlum leh thau tha lo a tam loh nan fimkhur ila. Nitinin Pathiana kan lawmna kawng 20 emaw tal ngaihtuah chhuak la, lawm thu sawi thin rawh.

3. Hlim taka nuih bawk bawk theihna hmuna kal fo hi a tangkai.Bible chuan Thufingte 17:22ah “Rilru hlim hi damdawi tha tak a ni,”a tih angina, ka damlo enkawlte zinga cancer veite chu nitina nuih bawk bawk theihna hmuna kal fo turin leh TV-a nuihza siam thin ho te hi en turin ka fuih thin.

4. Natuka thil lo thleng turah inngaihtuah buai lovin harsatna pawh lo thleng se Pathian tanpuina nen huai taka tuar ngam turin inpeih reng ang che.

A chunga ka han sawi takte hi cancer dona atan an pawimawh em em a, rinawm taka i zawm chuan Isaia 58:8naa a sawi, “I damna tur chu a lo chawr chhuak thuai ang; i felna chuan i hma a hruai ang a; Lalpa ropuina chu i hnu daltu a ni ang,” ti a Pathian thutiam hi a neitu i lo ni thei ang.”
Chhiartu Duhtakte, Lalpa’n malsawm theuh che u rawh se.

Kristaa in Unaute leh Thawhpui,

Women's Ministry of Mizo Seventh-Day Adventist Church