RTI Act chungchangah mipui leh Officer ten zirtirna pek an mamawh nasa

Rampuma hman mek, Right To Information Week pualin nimin khan Serchhip-ah pawh MSIC Chief Information Commissioner hovin RTI Awarness Campaign neih a ni a, he hunah hian Chief Information Commissioner chuan Mizoramah RTI Act chung-changah Awarness Campain neih a ngai nasa hlea a hriat thu a sawi a, hei hi thil ṭul tak niin a lang.

RTI Act hi kum 2005 aṭangin rampumah hman ṭan a ni a, mipui mimir hian RTI Act chu kan hre deuh vek tawhin a rinawm. Amaherawhchu RTI Act hi mipui mimir chu sawi loh, sawrkar Officer tam tak leh RTI Act chungchanga mawhphurhna pek ngei ngei ṭhenkhat te pawhin an hrechiang tawklo hle a, hei vang hian he dân ṭha tak hi a ṭangkai dan turin kan hmang ṭangkai tawk lo niin a lang a ni.

Mi tam tak chuan he dân hi chanchinbumite leh Politician (Opposition Party) te hman turah kan dah fo ṭhin a, sawrkar hnathawh dan diklo hai chhuahna leh sawrkar hnathawk te diklohna hai chhuahna hmanruaah chauh kan ngai ṭhin a. He ngaihdan hi a dik tawklo a ni. Mipui tu pawh hian he dân hmang hian sawrkar kaihhnawih leh sawrkar aṭanga sum dawng Organisation hrang hrangah kan duh kan zawt thei tih hi kan hriat thar a ṭul takzet a, mipui mimir hian RTI Act hi kan hman thiam phawt chuan kan khua/ram pawh hian nasa takin hma a sawn phah a rinawm.

Sawrkar Officer zingah RTI Act hrechiang tawk lo an awm ṭhin avangin anmahniin harsatna an tawh mai bakah RTI hmanga thil zâwttu ten an duh ang an hmuh loh phah ṭhin a, hei vang hian RTI Act chungchangah hian mipui te leh sawr Officer te hnenah tun aia zirtirna pek uar hi a ṭul hle niin a lang.