Ran khuahkhirhna thupek

Serchhip District Magistrate chuan November ni 2 khan Serchhip District huam chhunga mimal leh vantlang hmuna Ui, Ar, kel leh ran vulh dang reng reng chhuah khapna thupek a tichhuak a, he thupek hi khaw chhung alo thianghlim zawk nan leh khawtlang mipuite an lo him zawk nana chhuah a ni.

Serchhip District chhunga ran khuahkhirhna thupek hi ṭum engemawzat chhuah alo ni tawh ṭhin a, amaherawhchu mipui lamin thupek hi an zawm ṭhat ṭhin loh bakah thupek kengkawhtu lam pawhin an kengkawh ṭha tawk lo ṭhin a, chuvangin khaw dang chu sawi loh, District Capital, Serchhip-ah ngei pawh hian Ran Khuahkhirhna thupek hian awmzia a nei thuilo ṭhin hle a ni.

Mipui vantlang hmuna zalen taka kan ran vulh te kan tlattir ṭhin hi thianghlimna atan a ṭhat loh bakah mipuite himna leh hriselna atan pawh a ṭha lo hle a, mihring ran vulh te hian mihring tana hlauhawm hri ṭhalo tak tak an pu darh thei a, ui a seh phei chu a hlauhawmzia mitin hriat a ni.

Hei vang hian ran vulhtute hian kan ran vulhte hi kan ṭhenawm khawveng leh midang tan hnawksak an nih bakah midangte hriselna tichhe thei an ni tih hria a, kan ranvulh te khuahkhirhna châng kan hriat a pawimawh a, tin, thupek chhuahtu lam pawhin ran khuahkhirh a ṭulzia hria thupek chhuah an nih ang ngei a a kenkawh zui lamah pawh khauh taka an kalpui a ṭul hle a ni.