Kawngpui ṭha nei tur hian aw kan chhuah na tawklo a ni lo maw?

Serchhip khawpui chhunga motor kawngpui hi a chhe hle mai a, mi ṭhenkhat phei chuan District khawpui zingah Serchhip khaw chhung kawngpui a chhe ber min tihsak hial ṭhin a. A dik mai thei, Serchhip khaw chhung kawng hi a chhia a, kan kawngpui chhia ngaimawhna avangin hnatlang meuh neiin kan khaw chhung kawngpui thawm ṭhat hna kan lo thawk tawh ṭhin a nih kha.

Kan khawpui kawng chhia hi kan ram hruaitute pawhin an hria a, siam a nih tur thu pawh an sawi a, mahse tun thlengin damlo na zual deuh pawh hmanhmawh taka damdawi in panpui ngamawm loh khawpin kan kawngpui chu ala chhe ta reng rih a ni.

January thla kan chuangkai tawh a, kan khaw chhungah kawngpui siam hna thawk hmuh tur an la awm lova, tun ṭhal chhunga kan kawngpui te hi siam a nih loh chuan fur-ah chuan kawngpui siam theih a ni lo leh ang a, kum tluanin siam loh a ni chho leh mai dawn a ni.

Kan kawngpui chhiatzia hi keimahni leh keimahni kan inhrilh kan inhrilh a, a ṭhat phah chuang lova, a siam ṭha theitu ni lo hnena hian kan kawngpui chhiatzia kan hrilh zat hi a siamṭha theitute hnenah hian hrilh ve ta ila kan kawngpui hian a ṭhat phah thei mai lo maw? Nitina kan kawngpui hmangtu mimal leh pawlho zingah hian engzatinnge kan kawng chhia te siam ṭha thuai tura ram hruaitute hnena ngenna thlen tawh? Nitina hmang ve-tu ni loten ṭul an tih huna min rawn siamsak hun hi kan nghak tawp mai dawn em ni? tih hi i inzawt teh ang u.

Kan khawpui chhung kawng chhia hi a tuar nasa bertute chu a chhunga cheng mipuite kan ni a, motor neitute an khawngaihthlak zual a, District danga an motor ang nei ve tho te nena road tax chawi inang reng-ah an motor a rim bik a, a chhe hma bik bawk a, District khawpui dang te aia kawng chhe zawk neih hi kan chanvo a ni biklo tih mipuite hian kan hriat a, kawngpui ṭha neih kan duhzia lantira âw kan lo chhuah tawh aia na zawka âw kan chhuah a hun hle tawh niin a lang.