Chhiatna thleng tuar nêp thei tura ruahmanna siam a ṭul

Nimin khan Mizoram State Disaster Audit Team chuan chhiatrupna lo thlen palha Serchhip District chhunga chet lak dan tur leh Department-ten chêt lâk dan tur an ruahmanna (Serchhip District Disaster Plan leh Departmental Disaster Plan) te endikna hun an hmang a ni.

Chhiatrupna (Disaster) hi engtika lo thleng tur nge tih leh engtianga nasaa thleng tur nge tih hi hriat lawk a ni lova, engtiklai pawha lo thleng thei reng a nih avangin, chutiang huna chêt lâk dan tur ruahmanna ṭha leh felfai tak nena lo inbuatsaih sa chu thil ṭha tak a ni.

Chhiatrupna (Disaster) hi khuarel chhiatna (Natural Disaster) leh mihringin kan insiamchawp (Manmade Disaster)-ah te ṭhen a ni a, heng chhiatna te hi a lo thlen hun tur leh a thlen dan tur leh nasat dan tur te hriat lawk theih a nih loh avang hian chhiatna lo thleng tur hi lo dan theih a ni lova, thleng lo tura vên hleih theih pawh a ni lova, amaherawhchu, hetianga chhiatna alo thlen palh pawha a tuar na lo thei ang ber tur hian kawng tam takin a lo inruahman ve theih niin a lang.

Kan ram hi lirnghing na tak thlen theihna hmuna awm kan ni tih mithiam ten an sawi ṭhin a, lirnghing na tak lo thlen palh pawha chet lak dan kan thiam theihna turin, lirnghing lo thlen thulha chet lak dan tur pawh a takin zir chhin fo a ni a, hei hian ṭhatna leh ṭangkaina tam tak a neih ngei a rinawm.

Chutihlaiin, hetianga chhiatna alo thlen pawha mipuiin kan tawrh nasat loh dan tur ngaihtuah chunga keimahni kan inruahman a ṭul a, hemi kawngah pawh hian sawrkar hian hma a lak a ṭul takzet a, a pawimawh hmasa ber nia lang chu kan in sak dan leh in sakna hmunah te ram pumah ruahmanna mumal leh khuahkhirhna mumal tak awm thei se, tin, Mizoramina chhiatna kan tawh zinga tam ber, Leimin hi a tam zawk hi chu mihring siamchawp niin a lang a, chuvangin mihring siam chawp chhiatna te a tlem thei ang ber kan tawrh theihna turin ruahmanna siam pawh hi thil ṭul tak niin a lang.

About Editor

C.Lalrochhuanga, New Serchhip, Serchhip - 796181 Mizoram Contact: 8974286711

Leave a Reply

Your email address will not be published. Required fields are marked *