Ram economy chawikan nan Agri. leh Horti. lamah tan la ang

Nimin khan Missions for Integrated Development of Horticulture hmanga Serchhip District Horticulture Department ten fur Zikhlum leh fur Tomato an kui ṭiah chu a loneitute hnena pek turin a vai liam a ni a, heng thlai chi ṭiak engemawzat hi loneituten an hlawkpui ngei a beiseiawm a ni.Thlai chin (Agriculture & Horticulture) lam hi ramin hma a sawnna tura rahbi pawimawh hmasa berte zinga mi a ni a, buh leh bal, thlai leh thei te hi ram tam tak te sum dinhmun tiṭhatu a ni a, chuvangin kan ram hmasawnna atan tur atan pawh Agriculture leh Horticulture hian hmun a chang thûk hle a, amaherawhchu kan ram economy chawikangtu atana Agriculture leh Horticulture kan hmang dawn a nih chuan kan thlai chin dan phung te leh kan thlai chi thleng hian kan ram mil tura Science thiamna hmanga kan ṭhuam ṭhat a ṭul a ni.

Agriculture-a khawvelin hma an sawnna bulpui ber chu Green Revolution hi a ni a, Green Revolution-ah chuan mithiam ten research beiin, Science & Technology hmang ṭangkaiin thlai chi te an siam danglam a, chu chuan nasa takin thlai thar a tihlâwk a, hei hi hria-in kan sawrkar pawhin hemi kawngah hian ṭan a la mek a, a lawmawm hle a, hei bakah hian kan ṭhalai, Science lama thiamna sang tak tak nei te pawh hian Agriculture leh Horticulture hmanga kan ram economy chawikan tuma kan beih a ṭul hle a ni.

Ram dangah chuan an ram mil turin an thlai chin dan leh an thlai chi te an thuam ṭha a, an ram mila an hlawhtlinpui theih em em kha kan ramah kan hlawhtlinpui ve thei kher lo a ni. Chuvangin, kan ṭhalai mithiam tak tak te hian kan ram chhung ngeia hlawk zawka chin dan tur technology leh kan ram leilunga thar hlawk thei tur thlai chi te chi keimahni ngeiin kan siam chhuah theih chuan nasa takin kan ram economy hi kan chawikang thei dawn a, tun dinhmunah chuan kuthnathawktu thiamna nei sang lo tak tak tam zawk te hian hmanlai aṭanga an thlai chin dan leh thlai chi an la hmang a, hemi hmang ringawt hi chuan thar hlâwk a har a, Agriculture leh Horticulture-a kan kalphung thlak danglam tura hmahruai turin ṭhalai lehkhathiam te kan ramin a mamawh mek a ni.

About Editor

C.Lalrochhuanga, New Serchhip, Serchhip - 796181 Mizoram Contact: 8974286711

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.