Professional Tax lâk dan hi ennawn a ngai niin a lang

Sawrkarin a hnathawk te hnen aṭanga Professional Tax a lâksak dan hian sawi a hlawh hle a, Professional Tax lak dân hi chhût chian chuan sawisêl hlawh âwm tak pawh niin a lang.
Tun dinhmuna a lan dan chuan kum khata cheng nuai khat chin chung lam la chuan Professional Tax hi Rs.2500/- vek an chawi a, a sâng lamah chuan bituk a awm lova, kum khata cheng nuai 10 chuang lalût te pawhin Rs.2500/- tho an chawi a, sawrkar hnathawk nghet zingah hian kum khata cheng nuai khat aia tlem lalut chu an awm hmel loh a, chuvangin sawrkar hnathawk nghet zawng zawng hian kum khatah Rs.2500/- an chawi vek niin a lang a, Professoinal Tax-a sawrkar hnathawk te chawi zât a inan vek lai hian sawrkar aṭanga hlawh an lak erawh a inthlau hlawm hle thung a, hna hniam ber thawk a, hlawh hniam ber hlawh ten kum khata cheng nuai 1 chuang hret an lâkluh theih laiin a hlawh tam ber-ten cheng nuai 10 chuang te an lalut thei thung a, hetianga sawrkarin tax a lâksak hi a hlawh tlêm deuh te tan chuan hleih nei taka rorêlnaah a ngaih theih ang a, a hlawh tam deuh te tan pawh mahni hnuaia mi, an peon te nena tax inang khat pêk hi zahthlâkna chen pawh a awm thei hial âwm e.

Hetihlai hian sawrkara a nghet lova thawk, Muster Roll te aṭang pawhin Professional Tax hi lâk a ni a, chutihlai chuan District hrang hranga Muster Roll te aṭanga Professional Tax lâk dan hi a inzât lo nuai bawk niin sawi a ni a, hetiang tehnuaia sawrkarin ruahmanna mumal nei lova Tax a la hi sawrkar tan pawh mualphona nasa tak niin a lang.

Chuvangin, sawrkar hian a hnuaia a hnathawkte aṭanga Professional Tax a lâk dân hi a ennawn a ngai niin a lang. Professional Tax lâk hi sawrkar tihtur a ni a, sawrkar hnathawk te tan pawh Professional Tax chawi hi a na lo a, chutihrual chuan sawisel hlawh lo zawka he tax hi lak a nih theih nan hlawh tam chuan an chawi tamna tur leh a hlawh tlemin an chawi tlemna turin, an hlawh aṭanga a percentage zawnga tax an chawi dan tur ruahmanna siam hi a ngai niin a lang a, chu chu a hnuaia hnathawkte tan pawha rualkhai tak a rorelna tur a ni dawn a ni.

About Editor

C.Lalrochhuanga, New Serchhip, Serchhip - 796181 Mizoram Contact: 8974286711

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.