Bengkhuaia In hmunah Lungphun a ni ta — Lalhmangaiha Chawngthu

Mizorama Chanchintha lo luh ni champha, Missionary day Jan 11, 2012 khan Kawlri Lal Bengkhuaia in hmunah lungphun mawi tak tundin a ni ta. Serchhip DC hlui Pu H.Darzika leh Vengchung VC ten `30,000/- an pek leh mimal tlawmngaite hnena pawisa kan khawn tlingkhawm hmangin Zoluti Committee leh Vengchung K|P ten kan phun a ni. Lungphunah chuan hetiang hian a inziak a

KAWLRI LAL BENGKHUAIA IN HMUN
(Zoluti tualchaina)
1871-1872
The Whilom head hunter, By Rev J.H. Lorrain(Pu Buanga) ziak; Baptist Missionary Society Archive, London ami Rev C.L. Hminga'n 1976-a a lak atangin Zoluti an kawlna leh lakletna chu helai hmun ngei hi a ni tih a chiang.

1. He hmun atang hian Cachar-a rammut an rel.
It was the month of Jan 1871... in the warm winter sunshine... in one of them KAWLRI by name... a big drinking party was in progress. At this gathering the final arrangements for a long projected head hunting expedition to the far-off tea gardens of Cachar were being discussed.

2. He hmunah ngei hian Zoluti a kawl.
We must now return to marry, living in a happy contentment in the heart of the Lushai Hills at KAWLRI Village...

3. Heta tang ngei hian ZOLUTI chu laklet leh a ni.
Rothangpuia turned up so unexpectedly at Kawlri village... he did not find it difficult to persue the chief Bengkhuaia that it would be wise of him to release mary Winchester, and every other captives under his jurisdiction, as quickly as possible.

Rothangpuia chu rin loh takin Kawlri khuaah a lo lang hlawl mai a... Bengkhuaia chu Mary Winchester leh a sal man dangte tlang taka chhuah mai chu a finthlak ber ang tiin a rawn hmin thei ta a.

Phun ni: Jan 21, 2012
Zoluti laklet kum 140 champha leh
Serchhip Kohhran Centenary

Phuntute:
1. Zoluti Commt.Serchhip
2. Serchhip V/C I
3. Vengchung Br. KTP.

Heng lungphunin a tum ber chu mi tam takin Bengkhuaia hian Kawlri khua hi thut ve lova an sawi thin avangin Kawlri ah a inhmun a awm ngei a, Pu Buanag pawhin Kawlri khuaa Bengkhuaia a lal laiin Zoluti man tur ral an rel te, Kawlri khuaa a kawl te, Kawlri atang ngeia lak let anih te a lo ziak thlap a ni tih hi khawvela puang chhuak turin Bengkhuaia in hmunah lung kan phun a ni.

Aizawl-Lunglei Road atangin Serchhip khawthlang lam tlang sang tak i hmu ang a, VC-I ten Chawlh Buk tha tak an sak i hmu ang. Chu chu Chawngpuii nu lunglen tlang a ni. Hei pawh hi thawnthu ngaihnawm tak nei a ni. Chawngpuii nu lunglen tlang hnuai, khawthlang lam hmun zawl nuam tak chu Bengkhuaia in hmun, lung kan phunna chu a ni. Bengkhuaia in hma lamah Zawlbuk hmun a awm a, a thlang deuh chu Pastor Chhawna in hmun, inlarna a hmuh thin laia a awmna chu a ni. Mizo Israel ten lung an phun tawh nghe nghe a. Pastor Chhawna in bul mai tlang bawk chu Biak in hmun thin a ni. Bengkhuaia in hmun khawthlang lam i thlir chuan Thenzawl khua i hmu thei ang.

Zoluti rawn la lettu Thangliana (TH Lewin) a ngeiin a lehkhabu 'A Fly on the Wheel' phek 282-ah heti hian a ziak a... "Capt Battye, went east... a mile below camp was a stream, the passage of which was barred by large bodies of armed Lushais... I found the ford guarded by Benkuia's men. (Khawchhak lamah chuan kalkhan chu Bengkhuaia mi ten an lo dang a) a tih te nen khan a inmil thlap a ni tih a hmun atangin en ve teh le. Bengkhuaia in hmun lungphun thlengin thal lai hi chuan Bike, Car te pawhin i kal thei ang.

A tui mite tan chuan Tlang san zawng tehna nen lokal ula, Kawlri tlang hi feet 4222, Mat lui khawchhak lam ani em tih te pawh han fiah teh u. A.S. reid-a'n Chin Lushai Land a ziah a map-ah khan Mat ral chhakah Bengkoye tih a ziak a, a hming hnuaiah Feet 4222 a tih avang khan han fiah teh u. Thil chakawm dang leh chu Thenzawl, Vai biak kai atanga Vai lam kawn(Kawlri) hi kawng zawng ta ila, Mel thum leh a chanve atanga Mel li vel a ni thei em tih te pawh hi a teh peih chuan teh atan a tha khawp ang.

Bengkhuaia Kawlria a awm laiin Zoluti an man a, an la let leh, Sailamah sang khua a siam. Thli chhia an tuar, Thenzawlah a thi, a thlan pawh Thenzawlah a awm anih chu. Serchhip, Sailam leh Thenzawl lal, Bengkhuaia hi a lo ropui hle tih kan hre mai awm e.

Chuvangin Historian te, ziakmi te, zirlaibu lo siamtu zawng zawng te pawh kan ngen duh che u chu heihi a ni. Mizo History ziaktu hmasa ber leh Pastor ropui tak Rev Liangkhaia’n kum 38 chuang mah “Zoluti lakletna hmun Sailam” a lo tih thin chu, 1976 atangin “Kawlri atangin an la let” tia a thlak leh ngam angleh Pu Zathianga, Sailam pa ngeiin “Zoluti chu Kawlri atanga lak let leh a ni” ti a 1966-a a lo ziah ang hian kan ti ve thei tawh dawn lawm ni?