Zoram Football hmasawnna tur FIFA hotute nen ngaihtuah

Khawvela football thuneitu lû ber FIFA aiawhte leh Mizoram a football buaipuitute chuan Inrinni khan Tourist Lodge, Aizawl ah Zoram football hmasawnna tur kawng hrang hrang an sawiho.
He hunah hian Mike Pfister, Asia a FIFA Senior Development Manager leh Dr. Shaji Prabhakaran, South Asia FIFA Development Officer te an rawn tel a. Mizoram Football Association (MFA) hruaitute bakah Sports & Youth Services Department, Mizoram State Sports Council, School Education Department, District Football Association, MPL Club te, Sponsor te, Football Coach te leh MFA hnuaia Committee peng hrang hrang aiawhte nen FIFA aiawhte hian inkawmhona hun tha tak an nei a ni.

FIFA chuan nakuma FIFA Under 17 World Cup nghahna tur India rama state 6 te bakah Mizoram hi vulh bik turin a thlang a, hemi zulzui hian MFA hnenah Marketing Officer leh Technical Officer pakhat ve ve a rawn pe tawh a. Anni hi FIFA in zir bikna te lo pe tawhin, chumi zulzui chuan Mizoram football dinhmun chu kawng hrang hranga chawikang turin hma an la ta a ni. An hmalakna te rawn thlithlai tur leh engtin nge chak zawka hmalak a nih theih ang tihte FIFA hotute hian an rawn buaipui a ni.

Mike Pfister chuan, “Technical lam hmalakna rah chu Marketing lam tana hralh chhuah tlak a ni tur a ni,” a ti a. Chumi tihhlawhtling tura football a inhnamhnawih peng tin ṭanrualna pawimawhzia a sawi.

FIFA Development Officer chuan football hi TV a kan hmuh ṭhin, player thiam leh lar tak takte chungchang, anni khawvel chauh a ni lo tih sawiin, hlawhtlinna leh hmasawnna inṭanna chu a chunglamah ni lovin, a hnuai lam aṭangin a ni zawk tih a sawi a. World champion ni mek Germany team zingah Boateng-a chiah an ram khawpui (capital) atanga lokal a ni tih sawiin, “Player dang zawng chu ram chhung hmun hrang hrang atanga lokal an ni,” a ti.

Football ah chuan hmun sang leh changkang ber berah hlawhtlinna a intan lova, khawi hmunah pawh hlawhtlinna a awm a ni, a ti a. Africa ram rethei tak takah pawh naupang tê aṭanga patling pui puiin zing varṭian atanga kawtthlera football an khelh thu leh, chutiang zinga mite chu nitin hian player tha tak tak Europe ah te an rawn lan nawlh nawlh thu a sawi.

National football in hma a sawn dawn chuan State Association in hma a sawn a ngai tih sawiin, State Association pawh District te leh a thawhpui hrang hrangte hmasawnnaah a innghat tih a sawi.

Mike Pfister chuan, “French football kalphung hi ka sawisel duh chiah lova, Academy tha tak tak an ngah em em a, mahse anni anga Academy nei tha ve lo Germany leh Italy te aiin footballer tha an chhuah tam chuang hauh lo,” a ti.

Kawtthlera inkhelh, Street football kan tih, nuam ti taka naupang leh thalaiten, mi tam berin an khelh phaka football hun hnaih hi football chawisanna tha ber nia a hriat thu a sawi a.

“Mi tam ber chuan football han tih hian Beckhama te, Ozil te angte hi kan mitthla nghal ngawt thin a, mahse khawvel pum han thlirin anni anga lar leh thiam hi chu chhete tak tak an ni. Football hi mipui mimir infiamna a ni a, za zela 99 chuang mah hi amateur player an ni,” a ti.

“Fifa in football kan thlir dan chu a khelha khelh ringawt hi a ni lova, kum 80 i nih hnuah pawh i la en thei tal a, chu chu football a i inhnamhnawihna a la ni tho mai. Sumdawnna lama kan thawhpuite pawh an tel ve vek a, hlawh phut lova inpete pawh an tel a, zirna in hrang hrangte pawh an tel ve a, ram aiawha inkhel ten hlawhtlinna an neih changin sorkar hotute pawh an lo lawm thin a, chutiang mi chi hrang hrangte chu football chhungkuaah hian kan tel vek a ni. Chuvangin, khelmual chhunga player 11 te chauh hi kan ngaihsak bik tur a nilova, kan ngaihtuahna hi a zau hle tur a ni. Vawiinah pawh hian football chhungkaw hung tak in rawn punkhawm avangin ka lawm hle a ni,” tiin Mike Pfister chuan a sawi.

FIFA hmunpui Zurich atanga lokal Mike Pfister chuan India in Fifa Under 17 World Cup a thlen tur chu India ram in football hmasawn phahnan a hman ngei a beisei thu a sawi bawk.

Football a hlawhtlinna chu a nuam china duhtawk mai lova, che chhuaka beihngawrhnaah a innghat tih sawiin, chumi atan chuan department hrang hranga mite kan incho tawn a ngai tih a sawi a. Technical lam hotute, marketing lam hotute, coach te, Association hotute, referee te pawh kan incho tawn a, ṭang mar at tura kan incho tawn a pawimawh tih a sawi bawk a ni.

FIFA aiawhte hian tukin khan Sports Minister Pu Zodintluanga hmuin, Zoram football dinhmun chawikang tura Fifa hmalak tum dan hrang hrang an sawipui a. Pu Zodintluanga chuan FIFA hmalakna chu lawmawm a tihzia te lo hrilhin, state sorkar in Mizoram FA a thlawp ṭhat zia te, khawtinin khelmual ṭha neih an duh thu te a lo hrilh a, football a Zofate tuihalna phuhru tura sorkar hmalak mek dante pawh a lo hrilh a ni.

South Asia a FIFA aiawh Dr. Shaji Prabhakaran chuan football hian khawtlang nunah nghawng tha tak nei se an duh thu leh, sum leh paia hlawkna chauh FIFA in a ngaihtuah ber loh thute a sawi a. Mizoram football vanneihna pakhat chu sorkar in State FA a pui tha em em mai hi a ni tih a sawi bawk.

Sairang Dinthar a Mizoram Football Association khelmual, FIFA in Artificial Turf a rawn phahna tur hmun chu nimin khan FIFA hotu pahnihte hian an haw pahin an tlawh nghal a ni.

Mizoram Football Association hian Mizoram sorkar hnuaia Department hrang hrang bakah company lian te a thawhpui chho ṭan a, felfai zawka Mizoram Football kalphung hi kaihhruai a nih theihnan tunah hian Mizoram FA chu a insingsa mek a ni.

About Editor

Editor, Zothlifim Daily Newspaper, Serchhip - 796181, Mizoram.

Leave a Reply

Your email address will not be published. Required fields are marked *