Sports Minister Pu Zodintluanga’n VISION 2016 hawng

default

Olympics 2016-a Mizo infiammiten India ram ai an awh phak ngei theihna tura beihpui thlakna tura Sports & Youth Services Department-in ruahmanna a kalpui mek, VISION 2016 chu nimin khan Aizawl-ah Sports Minister Pu Zodintluanga’n a hawng.

Hawnna thusawiin, Sports Minister chuan, India sawrkarin Olympics-a medal tam zawk la tura inbuatsaihna atan Vision 2020 a kalpui mek laiin, Mizoram chuan Vision 2016 hmanga infiammite India team-a tahluh a tum ve thung a ni. Mizo thalaiten Olympics-ah medal la nghal kher lo mahse, India ram aiawha an tel phawt chu inphochhuahna tur rahbi hmasa a ni dawn a ni a ti a. “Catch Them Young programme hnuaiah infiamna lama talent nei \ha leh chher chhoh tlak tam tak hmuhchhuah zinga a beiseiawm zualte chu kum khatah ni 300 chhung Coach-ten an enkawl anga Infiammiten Olympics medal awrh chakna rilru an neih thin kha a taka tipuitling turin sawrkar chuan an mamawh apiang a ngaihtuahsak chho mek a ni a ti.

Sports Minister chuan Kawnpui-a hockey khelmuala astro-turf phah tura German mithiam a lo thlen tawh thu leh, ni 25 chhunga a hna hi thawk zo hman tura beisei a nih thu a sawi a. Hei bakah hian, Mission Veng-a Kawltheihuan-ah Table Tennis khelhna tur bik hall leh weightlifting tihna hmun tur sak a ni dawn a; Boxing tan bik pawh hall hran sakna tura sum an hmuh tawh thu te, Ramhlun Indoor Stadium-a shooting range pakhat dang siam tum mek a nih thute pawh a sawi bawk.

VISION 2016 atan hian infiamna chi 9 thlurbing a ni dawn a; chungte chu – Archery, Badminton, Boxing, Hockey, Shooting, Weightlifting, Taekwondo, Judo leh Table Tennis te a ni ang a; heng infiamna peng hrang atan hian naupang 14-16 vel zel thlanchhuah an ni dawn a; hockey bikah chuan mi 24 thlanchhuah an ni ang.

Nimin vek khan Sports Minister ho hian Lawibual hmuna Standard Swimming Pool siamna hmun tur chu enfiah a ni a. He swimming pool hi Olympics standard a siam tur a ni a; a vang metre 25, a dung metre 50 a ni ang. Heta sum senso tur hi cheng vaibelchhe 4 ruahman a ni a, Mizoram State Sports Council chuan cheng vaibelchhe 1.82 an dawng tawh a; kut thlak tan a ni tawh a ni.

About Editor

Editor, Zothlifim Daily Newspaper, Serchhip - 796181, Mizoram.

Comments ( 2 )

  1. LB CHONGTHU

    Mizo dik takin Khawvel hmuha INDIA aram aiawh chunga MEDAL kan awrh leh hun a va nghahhlelh awmin he ruahmanna hian nasa takin kan thalai te a cho chhuak ngei ang…

  2. HRIATA CHHANGTE

    Sports lama sang state leh ram te hi chuan eizawnna ( industry / profession ) chi khatah an neih tawp maia…. eizawnna zahawm taka an saiim avangin theih patawp a beih an lo peih phah ta a… India level anga vai ho zinga eizawn chu a harsa deuh nngei ang a..NLUP level a sawrkar la run hian hetiang Vision ropui tak hi neih a thianglo nilovin..neih tur awm tawk , step by step siam thiam mtul ka ti hle mai…

Leave a Reply

Your email address will not be published. Required fields are marked *