Serchhip mipuite hnena Tui sem hun tur SMS hmanga hriattirna kalpui ṭan

SERCHHIP: PHED, Serchhip WATSAN Division-in an Consumer te hnena SMS hmanga tui an sem hun tur an hrilhhriatna tur Consumer Information System (SMS Blast) chu nimin khan PHED Engineer-in-Chief, Er. R.Lalfanliana’n a hawng a, Serchhip hi Mizoram-a hetiang thil kalpuina pahnihna a ni a, Serchhip hmaah hian Aizawl-ah he thil hi kalpui alo ni tawh a ni.
sms-blast-serchhipHawnna inkhawm, PHED, Serchhip WATSAN Division Office-a neihah hian Executive Engineer, Er. Lalhruaia chuan he hun hi kaihruaiin, hemi atana hma an lâk dan leh kalpui an tumdan te a sawi a, hawnna thu sawiin PHED Engineer-in-Chief, Er.R.Lalfanliana chuan “Tunlaiah mi kan buai em em tawh a, tui sem hun chânga mi tam takin hna ṭhulha nileng lenga hun leh tha an khawhral ṭhin tihtlem nan hetiang hian PHE Department chuan SMS hmanga tui sem hun mipui hnena inhrilhhriatna hi buatsaih kan ni a, mipui tan thil ṭangkai tak a nih kan beisei a ni” a ti a, he SMS Blast hi kan tichangtlung chho zel ang a, a sem ni bakah a sem hun tur darkar thlenga inhrilhhriat nan hman chhoh zel kan la tum dawn a ni” tiin, “Tui sem hi thil buaithlak tak mai a ni a, a khawl lam fel loh vang te, thawktu lam fel tawk loh vangte-in tui sem hun nghakin mi tam takin hna an ṭhulh thlawn fo ṭhin a, chu chu zawi zawia kan tihbo theih nan he thil hi ruahman a ni a, mipui lam pawhin ṭangkai taka in lo hman ngei ka beisei a ni” a ti bawk.

He huna thusawitu dang, Er. Lalmuanzova, PHED Chief Engineer, Zone-I pawhin Serchhip Division hi Mizoram puma Division entawntlak ber pawl a nih thu leh SMS Blast pawh hi thawktute inpekna leh an thawhhona ṭhat vanga hmang thei an ni tih a sawi.

Er. C.Lallunghnema, Superintending Engineer, PHED, Rural WATSAN Circle pawhin thusawiin, Serchhip chu Aizawl tih lohvah SMS Blast hmanga tui sem hun tur mipui hnena hrilh hre thei hmasa ber an nih thu a sawi a, hetia SMS hmanga tuisem hun mipui hnena puan-zar a nih dawn takah chuan thawktute pawh inthlahdah hman an ni dawn tawh lova, SMS bawhzui char char a ngaih tawh tur thu a sawi bawk.

Tun dinhmunah PHED, Serchhip WATSAN Division hnuaiah hian Serchhip Town chhungah nimin thleng khan Private House Water Connection nei chhungkaw 3224 an awm mek a, Connection nei thar hi an awm belh ve reng a, tuna SMS thawn chhuahna atan hian National Informatic Centre (NIC) Service hman a ni dawn a ni.

About Editor

Editor, Zothlifim Daily Newspaper, Serchhip - 796181, Mizoram.

Leave a Reply

Your email address will not be published. Required fields are marked *