Serchhip District MJA Press Tour a hlawhtling

Kolasib District chhunga Sawrkarin hmasawnna hna a thawh mek chi hrang hrang zirchiang tura kal Serchhip District MJA member te chu Inrinni tlai khan tluang takin Serchhip an lo thleng.

Serchhip District MJA member te hian March ni 20, 2014 (Ningani) khan Serchhip chhuahsanin Kolasib an pan a, NH-54 lamah kalin Mizoram PWD hnuaia Kawnpui leh Buichali inkar kawng siam lai mek an en nghal a, he kawng 30 Km. a thui hi package hnih (Package I hi kilometre 15, Package II hi kilometre 14.789) a ṭhen niin kawng siam hna Contract thawk turin ABCI Ltd. thlan an ni. Serchhip District MJA te hi Pu Henry Lalmuankima, SE, NH Circle-II, Pu Lalnuntluanga, SDO, NH Sub-Division V leh P.L. Dhiman, Project Director, ABCI ten Buichali ah lo hmuakin kawng Mualkhang Gas Bottling Plant hnuaia RCC Retaining Wall siam lai mek te, Kawng thar laih (Diversion Section) mek te pawh an tlawh ho nghal a, chanchinbumi ten kawng siam chungchanga harsatna an tawh chungchang zawhna chhangin Pu Henry-a chuan Mizoram chu ruahtui tamna anih bakah Revised Estimate sanction tlai vang te, ram mamawh compensation pek tur te Land Acquisition tihfel loh te a la awm avanga duh anga hna an thawk chak thei lo chu hrehawm an tih thu a sawi a, theihtawp chhuah a hma an lak reng thu leh an beisei anga hna a kal tluan chuan nikum fur laia kawng chhiat vanga harsatna nasa tak kha pumpelh thei ngei a an inrin  thu a sawi bawk. Hei bakah hian kawng siam tawh sa thawm ṭhat ngai te thawm that hna an thawh tan thu leh karhnih chhungin an zawh vek dawn thu a sawi a, Diversion section hi Fur a lo thlen huna motor lianin kawng a zawh tluan theih nan April ni 20, 2014 hmaa pavement work thawk zo vek tura Contractor te an hriattir tawh thu leh hemi hnu hian kawng hlui 2-lane a zauh ngai lai (Diversion ni lo) zawng hi thawh chhunzawm leh a kumin December thla ral hma a hna pumpui zo fel vek tura ruahmanna an siam thu a sawi bawk a ni.

IMG_6846March ni 21, 2014 (Zir-tawpni) zing dar 6 ah bul ṭanin Serchhip MJA te hian Kolasib Diakkawn-a NLUP Industry Trade atana Restaurant (Rin Rin Restaurant) thlangtu Pu R.Lalrotluanga te an tlawh a, an ni hian an nupa-in he Restaurant hi an buaipui a thla khata an hlep hi chawhrualin `23,500/- vel a ni tawh a ni. Kolasib aṭanga kilometre 20 a hla Bukvannei a Agriculture Department leh Godrej Agrovet Ltd. ten Oil Palm Mill an sak mek chu zingkarah hian an tlawh nghal a; kum 2012 September ni 15 khan Mizoram Chief Minister Pu Lalthan-hawla’n lungphum phumin hna thawh ṭan a ni a, April chawlh-kar hmasa bera hawn hman tura chak taka hma lak mek a ni bawk. Oil Palm Mill hi darkar khat a Oil Palm Metric Ton 5 her thei tur ni in, ram Acre 27.8 a zau ah Mill hi bun a ni a, chemical tel miah lova Oil Palm siam chhuah hna hi thawh a ni dawn a ni.

Oil Palm Mill an tlawh zawh hian Chemphaia Soil & Water Conservation Department-in NLUP tan liau liau a Rubber Nursery an siam chu an tlawh a, he Nursery-ah hian Polypot 40,000 a awm a, an zinga 13,000 hi a chhiat avangin 27,000 chauh a nung a, amaherawhchu Hortoki leh Rajdali a an Nursery ah Polypot 8000 vel a awmsa bawk avangin Kolsib District chhunga NLUP mamawh chu an phuhru tho dawn a ni tih Department official te chuan an lo sawi a, Chemphai Nursery atana senso zawng zawng hi NLUP pawisa atanga siam a ni a, budded stand hi Tripura atanga lak chhoh niin Nursery ah hian an lo enkawl a, NLUP 3rd leh 4th Phase Beneficiary te tan a ruahman niin May thla chhungin an sem chhhuak vek dawn a ni.

Chemphaiah vek hian NLUP 1st Phase hnuaia Fisheries Department kaltlanga Sangha Dil siam te an tlawh nghal a, Pi Silchuhthangi Sangha Dil bigha 4 a zau, a boral hnua a tupa C.Lalhmuchhuaka’n a enkawl sak zui te, Pu Vanlalchhuanga Sangha Dil bigha 3 a zau leh Pi Nubuangi Sangha Dil bigha 3 a zau te an tlawh a, Pi Silchuhthangi Sangha Dil aṭang hian kum tin Sangha quintal 8 vel hralh chhuah ziah a ni a, Pu Vanlalchhuanga hian quintal 5 vel leh Pi Nubuangi hian quintal 6 vel a hralh chhuak ziah bawk.

Chemphai an tlawh zawh hian kawlphetha Megawatt 12 pechhuak thei Serlui ‘B’ Hydel Project an tlawhin chipchiar takin an fang a, Pu Lalthanzuala, SDO, Serlui ‘B’ Hydel Project in lo kaihruaiin an hnathawh dan kalphung te a hrilhfiah a ni. Serlui ‘B’ HEP cheng vaibelchhe 210.12 senga din a ni a, civil work hi MECON Consultants ten thawkin BHEL (Bharat Heavy Electricals) ten Mechanical work an thawk thung a ni. Kum 2010 April thla aṭang power generation neih ṭan a ni a, March ni 20, 2014 thleng khan 102755483 unit generate tawh a ni a; chu chu unit khat `3.50/- a chhutin cheng vaibelchhe 35.96 man vel power a siam chhuak tawh tihna a ni. Serlui ‘B’ Power House chhunga Generator pathum te hian 6.6KV level in power an siam chhuak a, chu chu step-up transformer in 33KV level ah tihsan leh a ni a, chu chu Grid nen synchronised-in Bawktlang 132 KV sub-station, Kolasib lamah thawnchhuah leh ṭhin a ni. Heng khawl te hian kum khatah 44.68MU siam chhuak tura beisei niin kum 2012-2013 khan 39.61MU a siam chhuak thung. Tun dinhmunah hian Khawl pathum zinga pahnih te hi chhawr an ni a, heng khawl pahnih hian chawl miah lovin nitin darkar 24 hna an thawk a, 8MW bawr vel a tharchhuah ve reng avangin phai lam aṭanga kawlphetha lakluh a titlem a, Sawrkarin kawlphetha leina tura sum tam tak a pek ṭhin pawh engemaw chen a lo chhawk zangkhai ve a, khawl pathumna (Unit-III) erawh chu a Governing System (speed control na) leh MIV (Main Inlet Valve) lam te duhthusam a nih loh avangin siamṭhat leh tura hma lak mek a ni a, fur pui lo thlen hma a siamṭhat theih an inbeisei a ni.

Serlui ‘B’ HEP atang hian kilometre 30 vel a hla a awm North-Eastern Hydro Electric Power Corporation Ltd. (NEEPCO) ten Saipum khaw bula an thawh mek kawlphetha Megawatt 60 pe chhuak thei tur Tuirial Hydel Project tlawh nghalin chipchiar takin an fang a, he kum 1998 aṭanga thawh ṭan a ni a, harsatna tawh a nih avangin June ni 9, 2004 atang khan chawlhsan vang vang a ni a, Project cost te revised (cheng vbc. 913.63) a nih hnu ah Mizoram sawrkar hmalakna-in bul ṭan ṭhat leh a ni a, January ni 14, 2011 aṭang khan hna thawh chunzawm leh a ni. Head of Project Pu R.B.Sharma chuan Serchhip District MJA te zawhna chhangin tunah hian hna thawh tur zinga 60% chu thawh zawh a nih tawh thu a sawi a, kum 2015 chhunga engkim zawh fel an inbeisei thu a sawi bawk. He Tuirial HEP atanga kawlphetha siamchhuah aṭang hian 12% a thlawnin Mizoramin a dawng ang a, a bak zawng pawh hi State danga hralh lovin Mizoram sawrkarin a lei vek dawn a ni.

Serchhip District MJA Press Tour a kal te hi 11 an ni a, anmahni kaihruaitu Andrew H. Lalremruata, MIS, DIPRO Serchhip leh I&PR Technician te nen an vain mi 13 an ni a, I&PR Department leh NLUP Implementing Board kaltlanga tirh niin Kolasib District a an cham chhungin NLUP Line Departments, PWD, P&E Department leh Kolasib District MJA hruaitu ten an lo dawngsawng a ni.  Kolasib District MJA te hian an kalna apiangah an ṭawiawm zel bawk a ni.

About Editor

Editor, Zothlifim Daily Newspaper, Serchhip - 796181, Mizoram.

Comment ( 1 )

  1. HRIATA CHHANGTE

    Kan Serchhip District MJA rual…. kan ngaihdan leh beiseina min siamsaktu ho rual chuan …. Kolasib district chuan Serchhip district tluk ve na kawng 1 tal an lo neih in zu hmu em le….A ropui khawp mai, an lo thawk nasa bik khawp mai tiin kan haw leh deuh mai nge… Unscheduled stoppage ah Bagha kan zuk hmang deuh chawt….. Kan Journos te in pawimawh hle….. chanchinbu enkawl hi Missionary hna a ngaih tlat tur niin a lang….

Leave a Reply

Your email address will not be published. Required fields are marked *