Serchhip Bazar-a chawhmeh zuarte bukna hmanrua te endiksak

Nimin khan Serchhip Bazar Buildinga chawhmeh zuartute bûkna hmanruate chu Legal Metrology Department ten an endik sak.

Pu Lalsangzuala, Inspector, Legal Metrology Serchhip chuan Bazar Buildinga chawhmeh zuartu mi 12 te chu an bukna hmanrua endik sak tura a koh angin Legal Metrology Office-ah endik sak an ni a, an bukna leh buk lungte uluk tak endik sak niin siamrem ngaite an siamremsak a, heng an bukna hmanrua te hi a ṭha thawkhat a, fee pawh dan anga laksak an ni bawk a ni.

Pu Lalsangzuala chuan Standard of Weights and Measures (Enforcement) Act, 1985, Section-24 Chapter-VII in a phut angin sumdawng, bûkna leh tehkhawng hmanrua hmang-tute reng reng chuan kumtinin an hmanruate chu endik a, chhin-chhiahtir tur a ni a, endiknaah hian fee pawh dan anga pek nghal tur niin, endik loh hman-ruate chu dan anga man theih an ni a, lung in tan tir thlenga hrem theih an ni, a ti a. Sumdawng an kohte thuawih tak an hman-rua endik tir ṭhinte chungah lawmthu a sawi a, thuawih ve lote chungah erawh dan anga hremna pek an ni ang a ti.

Nimin chawhnu lamah vek hian M/s P.B. Lalzuithanga Filling Station, Serchhip tlawhin Petrol (MS) leh Diesel (HSD) lo thlengte an endik a, heng tuialhthei lo thleng te hi a tha hle a, tuialahthei an dah khawlsa te pawh a tul anga endik zui zel an tum a ni.

About Editor

Editor, Zothlifim Daily Newspaper, Serchhip - 796181, Mizoram.

Leave a Reply

Your email address will not be published. Required fields are marked *