Serchhip-ah Republic Day ropui taka lawm a ni

Serchhip January 27, 2012: Ram chhung hmun dangte rualin nimin khan Serchhip Field-II ah India Republic Day vawi 63-na ropui taka lawm a ni a, Serchhip District Bawrhsap Pu P.Lalchhuanga chu khuallian niin Hnam Puanzar pawt pharh a ni.

Nimina Serchhip-a Republic Day lawmnaah hian khuallian chuan Ceremonial Parade Contingent 13 (Arm-2, unarmed-9 & pipe band-2) te chibai an buk chhang letin mipui te hnenah thuchah a sawi a, district mipui zawng zawngte hnenah duhsakna hlanin, mipui tana ram venhim hna thawktu sipai te hnenah a bik takin chibai bukna a hlan bawk.

District Bawrhsap Pu P.Lalchhuanga chuan, India ram zalenna atana tha leh zung, an theihna zawng zawng senga an nunna hial hlantute bakah India ram mahni a ro inrel hrang tura dan leh hrai ṭha tak duang chhuak tute chu chawimawina sang leh zahna hlu hlan leh hriatreng a pawimawh thu sawiin, an inpekna ropui tak avanga India ram hi khawvela democracy ram lian ber leh hlawhtling ber ti a hriat hlawh phah a ni a ti a, Democracy innghahna lungphum pawimawh ber chu mipuiten kan aiawh a roreltu tur kan thlan hi a ni, tiin, February thlaa Village Council Election lo awm turah pawh mipui ten an dikna chanvo hria a phur taka tel ṭheuh turin a sawm nghal a ni.

Serchhip District chhunga sawrkar hmalakna hrang hrang zingah Serchhip khawpui infrastructure development hna engemaw zat thawh mek te, Sports Complex, Auditorium, Indoor Stadium engemaw zat sak mek a nih thu te leh Boxing Hall ṭha tak sak mek a nih thu te tarlangin heng bakah hnam leh khawtlang rohlu awm tawh sa te hi ṭhang leh thar lo awm zel turte tana kawng hrang hranga pawimawh tak tak an nih avangin uluk leh duat taka enkawl a ṭul a tih thu a sawi a, neitu rilru pu chunga sawrkar bungrua te enkawl pui turin a sawm bawk.

Bawrhsap chuan Sawrkar Flagship programme NLUP pawh nikum January ni 14 a bul ṭan anih aṭang khan Serchhip District-ah a thawhkhatna atan chhungkaw 3074 hnenah ṭanpuina sem chhuah a nih tawh thu a sawi a, a thawh hnihna atan chhungkaw 3054 hnenah ṭanpuina semchhuah tur peihfel thawkhat a nih tawh thu sawiin, a thawh thumna leh thawh li-na atan chhungkaw dang 3663 ṭanpuina tur pawh ruahmanna siam mek a nih thu a sawi bawk.

Republic Day lawmna inkhawmah hian SSA Pipe Band-ten Band Display hmuhnawm tak entirin, Serchhip YMA Sub-Headquarters Cultural Troupe ten hnam lâm hmuhnawm tak an entir bakah 14 Assam Rifles ten Punjabi lam hmingthang Bhangra Dance an entir chuan mipui te lawm a hlawh hle a, Pu K.Lalhmingliana, Vengchung-in Dog Show hmuhnawm tak a entir bawk.

Hun tawpah Parade Contingent tiṭha hengte hnenah lawmman a sem zui nghal a ni a, Gov’t. JM High School chu pakhatna niin, Lal Thanhawla Higher secondary School chu pahnihna an ni a, Pathumna chu CV Residential High School te an ni.

Nimin khan Field No.-II-ah vek hian Republic Day DC Volleyball Running Trophy Final Match khelh a ni a, hetah hian Lalmama Volleyball Club, Chhiahtlang chuan Vengchung Volleyball Club hnehin an champion a, Nomawi leh tangkafai `7,000 an dawng a ni.