Republic Day lawmna pui ber New Delhi-ah

Ramchhunga Republic Day lawmna pui ber, New Delhi Rajpath-a neihah chuan President Pratibha Devisingh Patil-i’n hnam puanzar a pawh pharh zawhah Jammu & Kasmir atanga rawn luh ruk tum, Pakistan mifirfiak-te an dankirna lama thi ta, Lt Navdeep Singh-a hnenah huaisen chawimawina sang ber, Ashok Chakra a hlan a, hemi zawh hian MI-17 helicopter-ten boruak atangin parade en tura kal mi sang tel-te chung zawnah pangpar nawi an theh thla a ni.

Hemi hnu hian General Officer Commanding (Delhi), Lt Gen VK Pillai-a kaihhruaina hnuaiah parade ropui tak neih zui a ni a, sipai chi hrang hrang-ten an ralthuam leh hmanraw neih tha ber berte kawng zawhpuiin sawrkar laipuia ministry leh department hrang hrang bakah state 23-in an hnam ziarang tarlanna tableau hmuhnawm tak tak an entir bawk a, Border Security Force-in motorcycle-in an thiam thil hmuhnawm tak tak an entir bawk a ni.