MJA Serchhip District-in Annual Conference hmang

SERCHHIP: Zirtawpni khan MJA, Serchhip District chuan Serchhip Sub-Hqrs. YMA Meeting Hall-ah Annual Conference vawi 10-na an hmang a, he hun hi Chief Minister Pu Lal Thanhawla chuan khuallian niin a hmanpui a ni.

He hunah hian khuallian, Chief Minister chuan thusawiin, State dangah Mizorama chanchinbumite intelkhawmna anga \ha hi a awm ve ngai lo tih a sawi a, Mizoram chu Kristian ram kan nih anga thudik leh thu taka inchawm chhoh chu \ha a tih thu a sawi a, Ram inrelbawlnaah diklo hulhual kan hriatah chuan sawrkar pawh kan sawisel tur a ni a, mahse constructive a ni tur a ni a ti a, chanchinbumite chu mipuite tichiaitu ni lova, mipuite hnena thudik thlentu ni turin a chah bawk.

Tunlaia buaina pakhat NIAS, Kolkata chungchang pawh sawiin, NIAS-ah hian LE&IT Department chuan zirlai 32 a thawn a, heng zinga zirlai 28 hian kum 2015 khan First year an exam a, an zinga 4-in an chhuahsan a, May thlaa Graduation exam nei mai tur pawh an la awm tih a sawi a. Heng zirlai kal zingah hian mi dukdaklo an awm ve a, chung mite thu chu MNF party chuan an la tih sawiin, Minister leh MLA te thil tisual ve thei lova an beisei tlat chu \ha lo a tih thu a sawi a, NIAS chu West Bengal sawrkar hnuaia in-register a nih thu sawiin, a lem a nih leh nih loh endik turin MSU leh MZP aiawh mi pahnih ve ve tirh an nih tur thu a sawi bawk.

Chief Minister chuan MJA hruaituten a hnena thu an lo thlen tawh angin Mizoram-a chanchinbumite damloha inenkawlna leh chhiattawha inralna atana hman \hin, Mizoram Journalist Welfare Fund chu tihpun a nih tur thu a sawi a, MJA, Serchhip District-ten Press Club an mamawh thu an lo thlen chungchang pawh sawi langin, Press Club hmun tur an neih ve leh Press Club sak bul \anna turin cheng nuai 10 a sanction nghal tur thu a sawi a, MJA, Serchhip District hnenah hian Conference pualin `50,000/- a hlan nghal bawk a ni.

Serchhip District MJA Conference 2017

Serchhip District MJA Conference 2017

He huna thusawitu dang Pu C.Lalhminghlua, President, MJA Serchhip District chuan MJA chu tu pawl tan emaw bika hma la thei an ni lo tih a sawi a, mimal leh sawrkar te, pawlho te, political party leh political party inkara palai hna thawk tur a nih avangin fimkhur takin he pawl hi a kal a ni a ti bawk.

MJA Gen. Hqrs. a\angain Conference hmanpuitu Pu C.Lalhmachhuana, General Secretary pawhin thu sawiin, Journalist Welfare Fund tipung tura Chief Minister hnena ngenna thlen a nih thu leh MJA lam pawhin sum engemawzata do lêt dan a ngaihtuah ve mek thu a sawi bawk.

Tun dinhmunah Serchhip District-ah hian MJA Member 15 an awm mek a, nimin chawhma khan an President, Pu C.Lalhminghlua kaihhruaiin rorel inkhawm neih leh report ngaihthlak a ni a, an thurel zingah ‘MJA Membership chungchang hi kum 2 dana ennawn \hin turin Gen. Hqrs.-ah thlen ni rawh se’ tih chu an pass a ni.

Chawhnu lam hun hi Vice President Pu C.Rameng-mawia’n  kaihruaiin, Chief Minister ho hian hun hman a ni a, Tv. Zonunsanga Kawlni, Gen. Secretary report ngaihthlak a ni a, Pu Lalremruata Ralte, Treasurer-in lawmthu sawiin hun a khar a, chawhnu lam hunah hian District Bawrhsap Dr. Lalrozama, IAS bakah Serchhip-a sawrkar department hrang hranga Head of Office te, Serchhip town chhunga VCP te leh tlawmngai pawl hrang hrang hruaitute leh MJA Member ni lo Serchhip leh a chhehvela thuthar theh-darhtute an tel a ni.

About Editor

Editor, Zothlifim Daily Newspaper, Serchhip - 796181, Mizoram.

Leave a Reply

Your email address will not be published. Required fields are marked *