MJA (SD)-in Annual Conference hmang

Serchhip February 1, 2012: Thawhṭanni khan Mizoram Journalist Association, Serchhip District chuan I&PR Conference Hall-ah Annual Conference hmangin hruaitu thar an thlang nghal a, he hun hi Pu P.Lalchhuanga, District Bawrhsap-in a hmanpui a ni.

Conference hun hi hun thumah ṭhenin hun khatna chu Pu C.Lalhminghlua, Vice-President-in a kaihruai a, he hunah hian President Pu Lalremruata Ralte leh khuallian, District Bawrhsap-ten thu an sawi a, khuallian chuan hmân aṭang tawhin ‘Ngunhnam aiin penin thil a tithei zawk’ tih alo ni ṭhin a, tunah phei chuan a ni leh zual tawh a, Media chu mipui te a diklo zawnga kaihruai theitu an nih avangin an fimkhur a ngai a, chanchinbu-a thuchhuak aṭangin ‘mipui aw’ alo chhuak ṭhin a ni tih a sawi bawk.

Democracy chu grassroot level aṭanga châwm nun ṭhat a ngai a, VC/MLA/MP inthlan te hi a pawimawh a, Grassroot aṭanga kan thlan ṭhat chuan a sâng zawkah pawh a ṭhat a rinawm a ti a. Democracy a ṭhan chhoh zel nan Media te an pawimawh tiin, Mipui te hian sawrkar hi tunge tih an hre lova, chuvangin sawrkar bungrua dim nachang an hre lova, sawrkar chu mipui siam a nih angin mipuite hi sawrkar chu an ni tih hi inzirtir uar ṭul a tih thu a sawi a, dân leh thupek kenkawh chungchangah pawh hlawhtling taka dan leh thupek kenkawh a nih theih nan mipuiten an mawhphurhna an hriat a ṭul a ni a ti a, kan kawngpui zim leh chêp lutuk te, kawng kal dan ṭha tawklo te chu nakinah kan la buaipui dawn a, chuvangin tuna a tihzauh theih lei leh a siamṭhat theih lai hian kan siam a ṭul a ti bawk.

Zirna lama mi hlawhtling te kan la chawimawi thiam tawk lova a hriat thu a sawi a, infiamna emaw, lehkha zirna lamah emaw pawh ni se ruihtheihthila insum loh chuan hlawhtlin a harsa tih a sawi bawk.

Hun ṭhen hnihnaah President Pu Lalremruata Ralte kaihhruainain rorel a ni a, an thu passed te chu :
1. Media Workshop Serchhipa neih a nih theih nan hmalak ni rawh se.
2. Electronic Media ten advertisment rule an neih theih nan MJA Gen Hqrs ah thlen ni rawh se.
3. Serchhip khawpui chhung kawngpui (NH-54) siamṭhat a nih theih nan hmalak ni rawh se.
4. Mizoram Journalist Welfare Rules hi huamzau zawka siamṭhat a nih theih nan hmalak ni rawh se.
5. Journalist ten pension kan neih ve theih nan chak lehzualin MJA in hma la rawh se.

Hun ṭhen thumnaah Serchhip District I&PR Officer Pu Andrew H.Lalremruata kaihhruaina hnuaiah hruaitu thar thlan a ni a, kum 2012-2014 chhung atana hruaitu thar an thlanchhuah te chu:
President : Pu Kapliana Pachuau
Vice President : Pu Lalremruata Ralte
Treasurer : Pu C.Lalhminghlua
Executive members:
1) Tv Zonunsanga Kawlni
2) Pu PC Vanlalhruaia
3) Pu C. Ramengmawia
4) Pu PC Zonunsanga
5) Pu R. Lalmuansanga