Mizoram leh Bangladesh inkar thawhhona sawidûn

Serchhip December 9, 2011: Mizoram rawn tlawh mek Bangladesh State Minister, Ministry of Chittagong Hill Tract Pu Dipankar Talukdar chuan nimin tuk khan Mizoram Chief Minister Pu Lal Thanhawla chu a chenna inah hmuin Mizoram leh Bangladesh inkara thawhhona leh sumdawnna chungchang huam zau takin an sawidun.

Mizoram Chief Minister Pu Lal Thanhawla chuan India nena an thawhhona turah Bangladesh sawrkar inhawnna leh hmalakna chu fakin, Mizoram kaltlanga Indo-Bangladesh Border Trade hlawhtling tur chuan kawng ṭha a pawimawh ber thu a sawi a, Chief Minister chuan Mizoram sawrkarin theihtawp a chhuah mek a, Bangladesh pawhin nasa zawka kawng siamṭhat lamah hma la turin a ngen a ni. Thailand-a a zin ṭuma an sawrkar hotute nena Indo-Bangladesh Trade chungchanga a sawinaah anni pawhin theihtawpa lo thlawp leh ṭanpui an inhuam thu an hrilh thu Pu Talukdar hi a hriattir a, Mizoram-a hnam tenau zawk - Chakma, Mara leh Lai-ten Autonomous District Council changtlung an neih thu sawiin, Pu Lal Thanhawla chuan an bial chhungah thuneihna thui tak pek an nih thu leh sawrkar laipui aṭang pawhin District Council tan a bik taka sum a lo lut ṭhin thu te a hrilh bawk a ni.

Bangladesh State Minister Pu Dipankar Talukdar chuan Border Trade atana thil bawhzui ngai zawng zawngte chu a hmawr an bawk fel ṭep tawh thu te, tun hnai maiah pawh Tripura state nen insumdawnna an hawn nual tawh thu te bakah Mizorama remna leh muanna tluan tling thlen kawnga Mizoram Chief Minister tha thawh ropui leh entawntlak a tih thu te a sawilang a, Mizorama remna siam a nih hnu kum 11-ah an ramah ngei pawh remna thuthlung ṭha tak ziak a ni ve thei tih sawilangin tunah chuan remna leh muanna boruak hnuaiah Bangladesh pawh nasa takin hmasawnna hmel a hmu chho zel a ni, Pu Talukdar chuan a ti.

He meeting-ah hian Trade & Commerce Minister Pu Lalrinliana Sailo leh Principal Secretary Pu LR Thanga ten Chief Minister hi an ṭawiawm a. Bangladesh Minister hi amah rawn zuitu mi pawimawh ten an ṭawiawm bawk a ni.

Mizoram Trade & Commerce Minister Pu Lalrinliana Sailo pawhin a thil ngaih pawimawh tarlangin Mizoram atanga hatkora tam tham tak Tripura kaltlanga Bangladesh-a thawn luh thin ah pum khatah `4/- zel Bangladesh sawrkarin chhiah a lo lak thin chu mimal taka lo hre turin a chah a ni.