Mipuite lungawi lohna rang taka thawidamna tur zirho

Thawhṭanni khan Serchhip DC Conference Hall-ah Langtlang sawrkar (Transparent Government) nei tura sawrkar hmalakna kal zel zinga pakhat, mipuite lungawilohna rang taka thawidamna (Public Grievance Redressal System) atana hmanraw pawimawh tak Centralised Public Grievance Redressal and Monitoring System (CPGRAMS) chungchanga inzirtirna neih a ni a, Training hi District Bawrhsap Pu P.Lalchhuanga’n hawngin Serchhip a sawrkar pisa hrang hrang hotute an tel ṭha hle a ni.

District Bawrhsap chuan CPGRAMS chu mipuiten sawrkar laka lungawilohna an neih te rang taka thawi dam a nih theih nan leh thudik hmanga chhânna pek an nih theihna atana Mizoram sawrkar hmalakna pawimawh tak a ni a ti a, he kalphung thar hi February thla laihawl vel aṭanga hman tura ruahman a nih avanga lo inhmakhawsuih lawk chu a ṭul a ni tih a sawi.

Serchhip District Informatics Officer Pu Lalruatmawia Zadeng chuan CPGRAMS chungchang hi powerpoint hmangin zirtirna a pe a, CPGRAMS hi internet kaltlanga mipuiten sawrkar laka an lungawilohna leh an hriatfiah duh an zawh theihna tur atana duan a ni a, computer thiamlo tan pawh an thil zawh duh te chu sawrkar pisa-ah kalin thawn sak turin an ngen thei dawn a, file kal dan zawng zawng hmuh theih veka a awm dawn avangin Complain siamtu chuan a thu zawhin a thlen chin leh sawrkarin hma a lak zui dan te internet kaltlangin a vil reng thei dawn a ni.