United State of America-a Mizo awmten pawl an din Mizo Society of America (MSA)-a an president Pu Runremliana Chhakchhuak chuan nimin khan Aizawl Press Club-ah chanchin-bumite kawmin USA-ah Mizo hnahthlak 8,500 vel an awm tawh thu sawiin, USA-a Mizo awmte an lo boral a nih pawhin kumin July aṭang chuan US dollar 2,000-in an inral ṭhin tawh dawn tih a sawi.
Inrinni zana Poland-a Rel in su-ah mi 14 an thi a, mi 60 chuang an hliam.
Polish Railway hotute sawi danin, rel pahnihte hi kawng pakhat an zawh dun vangin an insu a, rel pakhat zawk hi an khawpui Warsaw atangin a tlan chhuak a, pakhat hi chu Warsaw pana Przemysl a\anga tlan chhuak a ni ve thung a ni.
Zirtawpni kal taa United States-a thlipui vir chi, Tornado vanga thi chu mi 38 an tling tawh a. Sawrkar thuneitute’n Kentucky-ah mi 19, Indiana-ah mi 14, Ohio-ah mi 3 leh Alabama leh Goergia-ah mi pakhat ve ve an thi tih an sawi a ni.
He Tornado hian Cheng maktaduaih tam tak hu thil a ti chhe tawh a, hemi hma lam hian Tornado vang bawk hian Kansas, Missouri, Illinois leh Tennessee ah mi 13 an lo thi tawh bawk a ni.
US National Weather Service chuan thlipui na tak a tleh leh dawn avangin mipuite chu hmun him zawk pan turin a hriattir a ni.
Nigeria khawpui pakhat Jos-a nimina thih chilha Kristian Biak In pakhat beihna thlengah mi 3 an thi a, mita hmutute sawi danin, Church of Christ Biak In hi zing tawngtai inkhawm neih laiin car-a puak thei thil phur mipakhatin sut vak pahin a bomb pai chu a tipuak a ni.
He chetna hi an tiha chhal eng pawl mah la awmlo mahse Muslim firfiak pawl Boko Haram tih anih rin a ni a, he pawl hi Islam sorkar din ngiatin Nigeria ramchhung hmun hrang hrangah pawi khawihin an lo che tawh thin a ni.
Pakistan sawrkar chuan Prime Minister hlui Benazir Bhutto-i thihna chungchangah an President hlui Pervez Musharraf-a chu a inhnamhnawih ngei nia sawiin Red Corner Notice pek a, an ramah hruai kir ni se an ti.
Hemi vang hian sawrkar chuan an ram pum huap thil chhuitu pawl chu Interpol-ah lehkha ziaka an ngenna chu thehlut turin a hriattir a, hemi hi tih hlawhtlin a nih chuan Mushharraf-a hi Court-ah a inlan ngei a ngai dawn a ni.
Afghanistan Helmand province khawpui, Lashkar Gah-a nimina thihchilha car bomb tihpuahah mi 17 an thi a, midang thahnem tak an hliam bawk.
Provice Dy Police chief, Ka maludin Shirzai-a’n a sawi danin, bomb hi education dept building bula tihpuah a ni a, thi-te pawh civil mi deuh vek an ni. Thi leh hliam zat chiah hi hriat theih a la nilova, thi zingah hian ramdang sipai-te pawh an tel thei niin Pu Shirzai-a chuan a sawi a, bomb puak hian lirthei 6 a nghawr chhe vek tih a sawi bawk.
Philipines rama, Mindanao thliarkar a nimina leimin-ah mi 25 an thi a, mi 100 chuang chin hriat loin an la bo.
Sawrkar lam sawi danin, he leimin hi ni engemawzat ruah a sur vang niin an sawi a, thi te hi he thliarkar a lunghlu lai chhuak tute vek an ni a, chhan chhuah hna hi ngawrh taka beih mek a ni.
US-a awm, Kashmir thenhran tum pawl hruaitu Syed Ghulam Nabi Fai chuan Pakistan enthlatu-a puhna chu thudik a nih thu a sawi.
Kum 62-mi Fai-a hi ISI agent a puh a nih bakah Kashmir thenhrang tura America ngaihdan siam tir tuma puh a ni a, a chungchang hi Virginia-a US Eastern District Court chuan a ngaihtuah a ni.
Fai-a chuan amah puhna hrang hrangah a thiamlo tih court a hrilh a, kum 1990 leh 2011 inkarah Pakistan spy agency ISI atangin US Dollar maktaduai 3 chuang a hmu tih a inpuang a, ISI hotu lu, an security directorate thlengin a be pawp tih a sawi a ni.
Iran khawpui Teheran-a an embassy, Thawhlehni kaltaa beih a nih hnuah Britain chuan an embassy hi khar nghalin hnathawktute pawh Teheran chhuahsan vek turin a hriattir a, an ram embassy beihna chhan let nan British sawrkar chuan London-a Iran Embassy kharna thupek chhuahin Iran sawrkar mipawimawhte pawh darkar 48 chhunga United Kingdom chhuahsan vek turin a hriattir a ni.
RECENT COMMENTS