Khawlailung-a Tourism Village buatsaih dan tur zirchiang

Kar kalta Nilaini  khan Pu CL Ruala MP (LS)-in MP Model Village atana a thlan Khawlailung khuaa hmun hlui te chu Pu Mangjamang Tou-thang, IIS, PIB Aizawl Head leh Khawlailung khawtlang hruai-tuten  Tourism Village hmun tura buatsaih dan tur zirchiang-in an tlawh.
Pu Mangjamang Touthang leh Khawlailung khawtlang hruaitute hian Khawlailung khaw chunga awm, Khawlai-lung  khaw  hmunhlui ni ta, hman-lai pipute sulhnu  tam tak awm-na ‘Vai Tlâng’  leh  ‘Chawn-chhingi lunglen tlâng’, kum 1918 chho vela tlang lâr tak lo ni ṭhin chu an tlawh a, Pu Mangjamang Touthang chuan, he lai ram leh hmun hma vel hi khualzinte hip nana  ‘Zo In’ sak nan leh Pipute sulhnu chei ṭhat leh sawngbawl nana  hmun duhawm tak leh ṭha tak a nih thu sawiin, a hmun hma leh awm dan hrim hrim chu tidanglam lutuk lova sawngbawl a, hman-lai mite sulhnu tichhe lo thei ang bera a nihna ang anga chei ṭhat dan zawn nise a ti bawk.

Khualzin te hip nana ‘Zo In’ sakna tur hmun Khawlai-lung khawtlang hruaitute nena an enna hmun ‘Vai Tlang’ hi Khawlailung khaw awmna hmasa niin pipute sulhnu leh an inhmun te chu hmuh theihin a la awm a, tin, rambuai laia a India sipaiten  awmhmun khuar nana an hman  avangin a hmun pawh hi a la hnum ṭha hle a ni.

He tlang  bul lawka tlang pakhat ‘Chawnchhingi lunglen Tlang’ hi tlang lâr tak lo ni tawh ṭhin a ni a, he tlang  hming lo chhuahdan nia sawi chu kum 1918 chho vel khan Chhingvunga Hmar Fanu Chawnchhingi chu a pasal Ralkunga Ralte-in a thihsan avanga  a lungleng lutuk chuan he tlang hi tlangsang tak a nih avang leh khaw hawi/thlir velna nuam tak leh remchang tak a nih avanga belin, tui leh thingsemim chauh ringin a   riahchilh  char char a, Lal leh Upa ten an fanu lungleng lutuk chu  Faisa (Vaimin kan puah) in  an han  châwm tawp  mai a, chuvangin he Tlang hi tun thlengin ‘Chawnchhingi Lunglen Tlang’ tih alo  ni ta a ni, an ti.

About Editor

Editor, Zothlifim Daily Newspaper, Serchhip - 796181, Mizoram.

Leave a Reply

Your email address will not be published. Required fields are marked *