K.Liantlinga leh ZNP mi ṭhenkhat ten MNF zawm

k.liantlinga

Kan hlauhthawn angin a takin a thleng ta a ni:ZNP President
Zoram Nationalist Party (ZNP) Vice President, Pu K.Liantlinga, MLA hlui leh ZNP mi ṭhahnem takin Mizo National Front (MNF) an zawm.
Nimin khan an mahni lawmna pual inkhawm MNF Party Office, Hnam Run-ah neih a ni a, Pu K.Liantlinga bakah hian General Secretary 3 – Pu R.Vanlaltluanga, Pu David Lalnunpuia leh Pu Zodinsanga leh Secretary dang panga (5) bakah, Deputy Chief Organiser Pu Huanmawia, ZNP Ṭhalai Headquarter Vice President, Pu K. Ramsangzuala leh Aizawl South I ZNP Block President Pu Ramngaihawma leh veng hrang hrang aṭangin mi 170 chu MNF President Pu Zoramthanga’n MNF ah a lawmlut a ni.

Pu K. Liantlinga chuan Mizo Nationalism tihlawhtling turin an In puiah an haw niin a sawi a, ZNP party chu chhuahsan mah se, an dem lo tih sawiin, ZNP President nen inhmuh thiam lohna leh inhuatna engmah an nei hran lova, ram leh hnam tana rawngbawl tur leh humhim turin MNF zawm chu an tih makmawhah an ngai mai zawk a ni a ti.

ZNP aṭangin MLA-ah thlantlin niin Mizoram rorelna sang berah pawh hun hmang tawh mahse, mipuite beiseina sâng tak awmze nei si lo neihtir chu a lainat a, MLA pakhat pawh nei lovin an thlir leh nghahfak ber sawrkar tik ni a her chhuak dawn lo tih a chiang tawk tawh bawk tih a hriat thu sawiin, mipui te pawh beidawng lutuka siam a, a tawpah kham kova tlakpui emaw, tui thuk taka tlakpui emaw ai chuan tiin, Mizorama Regional Party lian ber a belhpui ta niin a sawi.

Pu Liantlinga chuan Congress party-in Mizoram chhungah vote zaa 35 bak an hûm lo va, zaa 65 chu Tualṭo party te Vote a nih avangin MNF-ah zai khata luanghovin, a duh chuan Congress zawm mai se, ram rawngbawl turin National leh Regional Party pahnih awm mai chu a tawk hlea a hriat thu a sawi a ni.

MNF President, Pu Zoramthanga chuan ZNP unau te chu Hnam thinlung ‘Nationalism’-a tui em em te an ni tih a sawi a, ZNP hotu pawimawh lo lutte nen sengkhawm hna thawktu tur ‘Forum’ siam a nih tur thu leh, Zoram dung leh vangah a rang lama fehchhuah prog-ramme siam a nih dawn thu a sawi a ni. Nimina Hnam Run inkhawm hi MNF Sr. Vice President, Pu Tawnluia’n a kaihruai a ni.

ZNP Vice President leh a sangawi-zawnpui ten ZNP an chhuahsan chung-changah ZNP President Pu Lalduhoma chuan, kum 2013 General Election dawn ata tawh an rilru tihah ru ṭhintu chu an hlauhthawn ang ngeiin a takin a lo thleng ta nge nge a ni a ti a, MLA dinhmun hiala lo hlangkaitu Party leh duh taka Vice President atana thlang tlingtu Party mipuite a phatsan ta mai chu hriat thiam a harin thinlung a na hle hlawm a ni a ti.

An party chhuansantu te chu an hnena an awm laia an thawhrimzia te theihnghilh lova hriat reng zawk ni se, ui tak chungin an kal zelna turah duhsakna an hlan tih a sawi a ni.

Tuna an chunga thil thleng chu, hruaitu thar tha tak takte nen an intuai thar lehna tur leh an chawrno lehna atana kawng hawn saktu a ni hlauh dawnin a lang a, chu chu reiloteah a taka hmuh thuai a beisei tih a sawi a ni.

About Editor

Editor, Zothlifim Daily Newspaper, Serchhip - 796181, Mizoram.

Leave a Reply

Your email address will not be published. Required fields are marked *