Infiamna

Carlos Tevez chuan Manchester City-ah la awm zel a duh thu a sawi a, an manager, Roberto Mancini nena an inkar pawh siamṭhat leh a nih tawh thu a sawi.

Kum 28-a upa, Tevez hi nikum December-a Bayern Munich nena an inkhelh dawna Mancini nen an intihthiam loh avang khan thla 6 chhung meuh City tan a khel lova, mahse City tana a game hnuhnung pathumah goal 4 a thun leh tawh a ni.

Real Madrid boss Jose Mourinho chuan inkhelh lam buaipui a tul loh lai, season tawp chawlh lai hian sporting director Zinedine Zidane chu he club atang hian nawrchhuah a tum ngei dawn tih Cadena SER chuan a tarlang.

France legend hi kum 3 kal taa president atana Florentino Perez thlan a nih khan advisor atan lak a ni a, May 2010-a Mourinho hian lakluh a nih veleh khan team lama inrawlh turin a ngen nghal a ni.

Dutch winger Arjen Robben chuan tunhnaia club-a a dinhmun chu enfiah a tul deuha a hriat avangin nipui transfer hunah Bayern Munich a chhuahsan mai thei.

Robben hi UEFA Champions League-a Real Madrid an hneh tum khan a team-mate Franck Ribery nen dressing room lamah an inhnial deuh nia sawi a ni. Hetih hunlai hian contract thar chungchanga an inbiak mek lai a ni a, mahse tunah chuan he inbiakna hi an tawpsan leh tawh.

Lionel Messi chuan nizan hmasa khan Nou Camp-a an mikhual, Granada lakah hattrick siamin, Barcelona tana Goal thun hnem ber record Cesar Rodriguez lo siam tawh, kum 60 chhung zet tumahin an khûm theih loh chu a khûm ta.

Messi hian minute 17-naah Record ding lai nih rual turin goal a thun a, minute 68-naah Record thar a siamna goal hi a thun ta a, hemi hnu hian record thar siam belh turin goal khat dang thun lehin goal a thun apiangin record thar a siam belh chho zel dawn ta a ni.

Frank Lampard chuan manager bang ta Andre Villas-Boas chu Chelsea a enkawl lai khan an hma hun a thlir nasa lutuk a, tun hun a ngaihthah a ni tih a sawi.

Villas-Boas hi tun thla tir lam khan ban a ni a, a tlakchhiatna chhan bera ngaih chu senior players-te nen an inkar a chhiat vang nia sawi a ni.

Villas-Boas hian Chelsea squad upa tawh tak hi naupang lama thlak tumin ṭan a la a, hemi vanga first team chang lo pawla ṭang Lampard hian Portuguese coach nena an inkar hi a ṭha vak lo tih a sawi lang tawh a ni.

Manchester City boss Roberto Mancini chu France-ah Lille inkhel en turin a zin chhuak a, a en duh ber chu Edin Hazard-a inkhel lai a nih a rinawm.

French champions hian Pathianni zan khan Valenciennes chu si 4 faiin an hneh a, he Belgian forward pawh hian start-in goal hmahruai a khung nghe nghe a ni.

South America lam aṭangin rawlthar ṭha tak an rawn chhuak leh dawn niin a lang a, Chelsea, Real Madrid, Inter Milan leh Napoli te chuan Douglas Baggio chu Flamengo aṭanga lei chhuah an tum mek nia sawi a ni.

Roger Federer chu Pathianni khan Indian Wells ATP tournament-a vawi 4 champion thei awmchhun a ni ta. He Swiss world number three hian final-a a tumpui, world number one Novak Djokovic hnehtu John Isner chu 7-6, 6-3 in a hneh a ni.

Isner hi palian tak, a serve pawh kawh ṭha tak a ni a, Federer pawh hian experience nei zawk a nihna hi a chakpui chauh niin a lang. Set khatna hi tie break-ah 9-7 in a la hram a, second set-ah hian vawi 2 a break leh bawk a, darkar khat leh minute 21 chhungin hnehna a chang a ni.

Kumin-a Formula One Season bul ṭanna, nimina Australian Grand Prix-ah McLaren Driver, Jenson Button chuan chak ber nihna changin Red Bull Driver Sebastian Vettel chu pahnihna niin, Button team-mate, Lewis Hamilton chu pathumna a ni.

Liverpool boss hlui Rafa Benitez chuan Chelsea manager nghet nih a duh thu a sawi chiang ta.

Spaniard Benitez chuan, "Trophies la duh manager chuan club lian an thlir a ngai. Chelsea hi club lian tak chu an ni," a ti a, temporary-a Andre Villas-Boas thlaktu atana sawm a nih thu erawh a pha a, offer mumal tak a la awm loh thu a sawi.