India lemchang thiam Dev Anand a boral

India lemchan thiam hmingthang, a hunlaia Bollywood Star zinga hmelṭha ber pawla sawi ṭhin, Dharam Dev Anand, 'Evergreen Romantic Superstar of Indian cinema' tia koh chu nimin, Pathianni zing lam khan kum 88 mi niin London-ah Lung nâ (cardiac arrest) vangin a boral!

Dev Anand hian hun engemawti aṭang khan insawiselna neuh neuh a neih avangin medical check-up turin London a pan a, hma sawn vak theilo-in, zual lam a pan zel a, a boral lai hian a fapa Sunil-a'n a awm pui a ni.

Dev Anand hi September ni 26, 1923 khan Shakargarh Tehsil, Gurdaspur district (chutih hun lai a Punjab State, tuna Pakistan ram ni ta)-ah alo piang a, Zirna lamah chuan English literature-ah Degree zovin, Government College, Lahore-ah ( Pakistan) a zir ṭhin a.

Kum 1946 khan lemchan khawvelah lut ṭanin, a flim chan hmasak ber chu 'Hum Ek Hain' a ni a. Kum 1947-a a film chan 'Ziddi' an release aṭang khan mi hriathlawh chho-in, khata ṭang khan India Filma Star lâr a ni zui ta a, ngaisangtu maktaduai tam tak nei Dev Anand-a hian chawimawina tam tak a dawng tawh a, chung zingah chuan India cinema hmasawnna tura a thawh ṭhat avangin Padma Bhushan leh Dada Saheb Phalke Award-te a dawng tawh a, film lar leh hlawhtling tam tak a chan zingah Baazi, Jewel Thief, CID, Johny Mera Naam, Amir Garib, Warrant, Hare Rama Hare Krishna leh Des Pardes te chu a lar zual a ni.