India

Ram chhunga political party hrang hrangte pawisa hman dan endik dan thar duan chu Election Commission chuan a pawmpui.

He dan duan thar hi zawm a nih chuan inthlannaa party hrangh rangte pawisa hman dan engkim a hmuh theih vek tawh ang a, hei hian vote inlei leh pawisa chhehrelh thlengin a veng thei tura beisei a ni.

Institute of Chartered Accountants of India (ICAI) buatsaih he dan thar hi Election Commission chuan party hrang hrangte bakah Income Tax department leh RBI te pawh a hriattir thuai dawn a ni.

Nimin Lok Sabha ṭhutkhawmnaah, House leader, Finance Minister ni bawk Pranab Mukherjee chuan Railway Minister Dinesh Trivedi-a bânna lehkha Prime Minister-in a dawn thu member te a hrilh.

Pu Mukherjee chuan bânna lehkha chu Pathianni tlaiah Prime Minister in a dawn thu sawiin, President hnenah thawn a ni leh phawt ang a, chumi hnuah an thutlukna chu House-ah puanchhuah a nih tur thu a sawi.

Inrinni zan khan Odisha-a helpawl Maoists ten Kandhamal leh Ganjam district-ah Italian tourists pahnih an kidnap.

Thulakna tarlan danin, he tourist 2 te hi tribal hmarua hrang hrang phochhuah te chu an ram sawrkar in tlawh an khap tih hre loin thla an la a,hetih lai hian helpawl te hian an lo kidnap ani. Helpawl hian sawrkar hnenah ngiatna an siam chu point 13 niin, an tih hlawhtlin sak hma loh chuan an mi man te hi an thlah zalen dawn lo niin an sawi.

Five year plan 12-na ruahhman dan angin, sawrkar laipui chuan West Bengal a District hnufual 11 tih changtlun nan cheng vaibelchhe 8750 a tuk.

Sawrkar laipui chuan ramchhunga hnam tlem zawkte tan cheng vaibelchhe 3100 a serh hrang a, hei hi kum kalta aiin cheng vaibelchhe 385 in a pung a ni.

Bihar Police 25 te chu thamna sum an lak avangin nimin khan Bihar sawrkar chuan an hna atangin a ban a, heng 25 zinga 16 hi sub-inspector niin , 7 chu Assistant Sub-Inspector an ni.

Police Director General, Abhayanandsawi dan chuan heng police ten thamna sum a la lai hi State Vigilance Bureau chuan an hmuh chian ngei avanga an hna atanga ban anni, ati a. eirukna vanga police 25 ban an nih hi an State a thil thlengah a vawi khatna niin a sawi a, he thilthleng hi State Police Headquarters te hmalakna niin a sawi bawk.

Naktuka North East Games vawi 26-na thleng tura inbuatsaihna chuan a vawrtawp a thleng chho ta.

Sports discipline hrang hrang nghahna tur hmun te nimin khan Sports Minister Pu Zodintluanga’n a tlawh leh a, khelmual, Rajiv Gandhi Stadium, Republic Field, leh Indoor Stadium hrang hrang cheihnum hna pawh nimin thleng khan ngawrh taka thawh zui a ni.

Nimin khan tunhnaia Assembly inthlan neih zawhna state-a chakna changtu Political party-ten an pawl hruaitu tur an thlang.

Uttar Pradesh-ah chuan Samajwadi Party President Mulayam Singh Yadav-a chu Chief Minister thar a nih tur thu an party-in an tichiang tawh a, Samajwadi party hian seat 403 awmah seat 224 an la a ni.

Lt General Bikram Singh-a chu Indian Army Chief thar a ni dawn tih sawrkar laipuiin a puang a, May ni 31-a chawl tur Gen VK Singh-a a thlak dawn a ni.

Pu Singh-a hi kum 40 chuang sawrkar tan a lo thawk tawh a, March ni 31, 1972 khan Sikh Light Infantry Regiment-ah lutin, Congo-ah UN Peace Keeping Force Deputy Commander hna a chelh tawh bakah Nicaragua leh El Salvador-ah te UN Observer nihna a lo chelh tawh a ni.

Nimin khan Indian Army chuan Brahmos Missile chu hlawhtling takin Rajasthan-ah a enchhin.

Sipai thupuangtu, Colonel Jagdeep Dahiya-a chuan Brahmo Missile chu India sipaite hman theih tura peih felin dah \hat a nih thu New Delhi-ah a sawi.