FSA hnuaiah buhfai dawng ṭan dawn

Food-Security-Bill

Food Security Scheme hnuaia buhfai man tlâwm dawng thei tura thlan te chuan tunkar chho hian buhfai an dawng ṭan thei tawh dawn.
Food, Civil Supplies & Consumer Affairs Minister Pu John Rotluangliana sawi danin tun March thla bul aṭang khan a taka Food Security Scheme hi kalpui chhoh zel a ni a, hemi pual bika Ration Card siam te chu District Civil Supplies Officer (DCSO) te’n sem chhuak tawhin Public Distribution Centre-ah pek a ni tawh a. Tun kar bul aṭang hian buhfai hi pêk chhuah ṭan tura ruahman a ni a. Hemi atan hian Food Corporation of India (FCI) chuan Mizoram buhfai chanpual tur pawh a tifel tawh niin Minister chuan a sawi.

Minister chuan Food Security Scheme tipuitlinga a taka hmang tur hian harsatna an tawk lemlo niin a sawi a, buhfai pawh mamawh tawk, chhung-kaw tin daih tur dawn chhoh mek a nih thu a sawi a ni.

Tarlan tawh ṭhin angin Food Security Scheme hnuaia buhfai man tlawma lei thei turte hi Mizoram mihring 11,97,158 awm anga ngaih zinga mi 6,44,906 (Mizoram mihring za zela 53.87) an ni ang a. Mi 5,52,252 erawh he ruahmanna hian a huam ve lo ang.

Food, Civil Supplies & Con-sumer Affairs department hnuaia DCSO 9-a an chhinchhiah danin Food Security Scheme hnuaiah hian ration card 1,36,877 a awm dawn a. AAY ration card 25,787 leh PHH (priority house-hold) ration card 1,11090 te an ni dawn a. FSA pawn lama a man to-a buhfai lei thei tur ration card awm zat chu 1,07,642 a ni a. A vai chuan Mizoram puma ration card 2,44,519 a ni dawn a ni.

Hamṭhatna dawng turte hi hlawm 2 – AAY Household leh Priority Households-ah ṭhen niin, AAY Household hnuaia chhungkuate hian thla khatah buhfai Kg 35, Kg 1-a `3/- zelin an lei thei ang a; Priority Household hnuaia mite ve thung chuan thlakhatah Kg 1-a `3/- zelin mi pakhat tan Kg 5 zel an lei thei dawn a ni.

Mizoram sawrkar chuan Food Security scheme hnuaia Priority Household-te leh Food Security scheme hnuaia ham-ṭhatna dawnglo tur chhungkua te tan ruahmanna a siam bawk a. Priority Household hnuai a mite hian Kg-a `3/-a kg 5 thla tin an lei bakah mi pakhat tan buhfai Kg 3, Kg khat `15/- hisapin an lei thei ang a. He ruahmanna-in a huam velohte erawh chuan mi pakhat tan Kg 1 `15/- hisapin thla khatah Kg 8 an lei thei bawk ang.

Heng bakah hian nu railai leh nau hnute pe laite chuan thla 6 chhung man neilovin buhfai an dawng thei dawn a, naupang thla 6 leh kum 6 inkar te’n a thlawnin Aganwadi kaltlangin chaw an dawng thei bawk ang.

About Editor

Editor, Zothlifim Daily Newspaper, Serchhip - 796181, Mizoram.

Leave a Reply

Your email address will not be published. Required fields are marked *