England lama Transfer thuthang ṭhenkhat

Nimin kha Transfer Window tâwp ni a ni a, England lama transfer thuthar lian zual deuh deuh te lo tarlang ila, he thu i chhiar lai hi chuan engkim a nih tur ang a ni fel vek tawh ang.

Transfer inhawn hma aṭang tawh a, Manchester City chhuahsan ngei tum, Carlos Tevez chu nimin, transfer hun tawp ni thleng pawh khan a dinhmun a la chiang thei lo a, amah hêltute zawng zawngin an kiansan tawh a, amah duhtu nia sawi Russian club hausa Anzhi Makhachkala chuan he thu buatsaihlai thleng hian offer an la siam lo a, a club hlui West Ham chuan duh mahse sum an neih hmel loh bawk si. Liverpool chuan Andy Carroll nena inthleng an duh nia sawi a awm bawk a, mahse Liverpool manager Kenny Dalgish chuan January transfer window-ah a squad tihdanglam a tum lo tih sawiin, Carroll chhuah tir tumna a awm anga sawi chu thudik lo a nih thu a sawi ve thung bawk si.

Queens Park Rangers chuan Nancy aṭanga midfielder Samba Diakite an lakluh hnu lawkah Lazio aṭangin French striker Djibril Cisse lalut turin an intintuah leh mek a. QPR hian Liverpool leh Sunderland player hlui hi personal terms-ah chuan inremna an siampui tawh a ni. Kum 30-a upa hian nipui lai khan Panathinaikos aṭangin Lazio hi a zawm a, mahse regular-a khelhna a chan theih loh avangin transfer hunlai ngeia chhuah a duh leh ta a ni. QPR boss Mark Hughes chuan Cisse hi loan-a la phawtin June thlaa a ngheta lakluh a duh a, mahse amah leh Lazio chuan tun aṭanga inlei fel nghal law law turin an nawr mek thung.