District Bawrhsapin Serchhip District MJA Member te a kâwm

SERCHHIP: Nimin khan Serchhip District Bawrhsap Pi Sangchhin Chinzah, MCS chuan a pisaah Mizoram Journalists’ Association, Serchhip District member te lêngah sawmin inkawmhona a neihpui.
Pi Sangchhin Chinzah chuan a hmaa DC lo awm tawhten nasa taka hma an laknaah thuthar lakhawmtute nen thawhhona ṭha an neih tawh angin amah pawh chu ram leh mipuiten hmasawnna ṭha an neih zel theihna turin thu-thar lakhawmtute chuan thawh-hona ṭha an neihpui a beisei thu a sawi a, thuthar thehdarh-tute chu mipuite sukthlek siam saktu an nih avangin an pawi-mawh em em a, a ṭha zawng leh a chhe zawng pawhin mipuite hi an kaihruai thei hle a. Hei vang hian Serchhip District MJA te pawh a ṭha zawnga mite zirtirtu, ramin hma a sawn zel theih nana mipuite kawhhmuh-tu an nih zel a beisei thu hrilhin, kawng tinrengah anmahni thawhpui turin a inralring reng tih a hrilh a, a ṭulna  apiangah finchhuah ṭhin turte, inpawh tlang taka an ngaimawh zawngte sawipui ṭhin turin chanchinbumite hi a sawm a ni.

District Bawrhsap chuan Serchhip District ah thawhpui tur MJA ṭha tak a din avanga a lawmthu a sawi a, thuthar lakhawmtute chu thawhpuia a sawm rualin an kâ erawh hup a tum loh thu a sawi a, amah ngei pawh chu a hna a thawh ṭhat tawk loh emaw, a hna thawh tur te a thawk lo a nih chuan a chanchin chu thuthar theh-darhtuten ziak mahse a hriat-thiam tur thu a sawi a, chutih-rualin chhiatna leh tihsual erawh inchânsak rân chu a ṭha lo a tih thu a sawi bawk.

Pi Sangchhin Chinzah hi Serchhip-ah BDO-in alo awm tawh a, Serchhip DC ni tura rawn dah a ni chu ama khuaa haw leha a inngaihthu sawiin, Serchhip-a hnathawh chu nuam a tih thu a sawi a, Serchhip mipuite chu fel a tih thu leh sawrkar hnathawkte chuan an hna thawhnaah dân zawm tur hrang hrangte an neih ve ṭhin avangin an thil tih theih loh chinah te innawr luih an ching lova a hriat thu te, sawrkar hnathawkte harsatna hrethiam tak an nia a hriat thu te a sawi bawk a ni.

He inkawm honaah hian Pu C Lalhminghlua, Serchhip MJA President pawhin thu sawiin, Serchhipa hun engemaw-chen lo awm tawh, Serchhip hrechiangtu leh intineitu tak mai Bawrhsapa a rawn ṭhu chu lawmawm a tih thu leh Serchhip mipuite pawh an thlamuang hle nia a hriat thu a sawi a, inkawmhona hun a buatsaih sak avang leh MJA tana inhawng taka hna thawk duh mi a nihnaah lawmthu a sawi a. Pu C.Lalhminghlua chuan sawrkar official te chu thawh-pui theih loh an neih loh thu sawiin, thuthar lakhawmtute chu sawrkar hnathawkte tan mi hlauhawm an nih loh thu a sawi a, an duh ber chu ram leh hnam, District hmasawnna tura lungrual taka thawhhona ṭha neih a nih thu a sawi bawk.

He hunah hian Serchhip District MJA Gen. Secretary Tv. Zonunsanga Kawlni chuan MJA member te nena inhmel-hriattirna hun a hmanga, member dangten an duhzawng sawina hun an hmang bawk a, chhun thingpui tuihnai tak an inho nghal a ni.

District Bawrhsap hi Addl DC Pi Zosangzuali Pachuau, SDO (Sadar) Pu R.Vanreng-puia leh Serchhip DIPRO Pu K.Saitluanga ten an ṭawiawm a, MJA member te pawh an kal ṭha hle a ni.

About Editor

Editor, Zothlifim Daily Newspaper, Serchhip - 796181, Mizoram.

Leave a Reply

Your email address will not be published. Required fields are marked *