Chhiatrupna thleng thei laka him nan chawngheia ṭawngṭai rualna neih rel

ztf-news

Mizoram Presbyterian Kohhran Hmeichhe Inkhawmpui lian rorel inkhawm chuan rampum huapa sual thupha chawi na’n leh chhiatrupna thleng thei laka him nan chawngheia ṭawngṭai rualna neih an rel.
Presbyterian Kohhran Hmeichhe inkhawmpui rorel inkhawm Mission Vengthlang Biakin-a neihah Inrinni khan Khuangleng bial leh Chanmari bial aṭanga lut, rampum huapa sual thupha chawi nan leh chhiatrupna thleng thei laka him nan chawnghei a ṭawngṭai rualna neih ni rawh se tihte chu sawi kawpa pawm a ni a. Rorel inkhawmah hian thu ngaihtuah tura Agenda 16 lut zing aṭangin 7 pass a ni a, chungte chu, Electric Bial thehluh, Moral Reform chungchang zirtirna neih ni rawh se tih te, Electric, Bawngkawn, Leitan leh Champhai Vengthlang bial atanga lut, Synod Hospital Durtlang tan Charity Fund pek ni se tihte, Bawngkawn bial atanga lut, HIV/AIDS veite tanpui nan Mizoram puma Kohhran hmeichhiate Thawhleh zan inkhawm tum khat thawhlawm pek ni rawh se tihte chu pawm a ni a.

Hei bakah hian Republic bial aṭanga lut, Central Committee atan khawpui chhung bial tin aṭanga inruat tawh lovin, Central Committee member hi tun aia tih-tlêm dan zawn nise tih te, Dawrpui bial aṭanga lut, ei leh in fimkhur dan ‘Food Safety’ inzirtir ni rawh se tih pawh pass a ni bawk.

Rorel inkhawmah hian kum 2016-17 Budget atan cheng nuai 36 pass a ni. Heng te hi Central Budget atan cheng nuai 13, Women Centre atan nuai 20 leh Agape Chanchinbu atan cheng nuai 3-te an ni.

Kum 2018-a rorel inkhawm neih lehna tur atan Tuikual Kohhran Biakin ruat a ni a, inkhawmpui neih hun tur chu March ni 9 leh ni 11 inkar a ni ang. Kum 2019-a Hmeichhe Inkhawmpui lian neih lehna tur atan Kolasib ruat a ni a, inkhawmpui hi Kolasib-a Pastor bial 3-in an inthlen ṭawm dawn a ni.

Hmeichhe inkhawmpui lian, rorel inkhawm hi nizan vek khan a ṭiak a ni.

About Editor

Editor, Zothlifim Daily Newspaper, Serchhip - 796181, Mizoram.

Leave a Reply

Your email address will not be published. Required fields are marked *