Britain-in London-a Iran Embassy khâr turin ti

Iran khawpui Teheran-a an embassy, Thawhlehni kaltaa beih a nih hnuah Britain chuan an embassy hi khar nghalin hnathawktute pawh Teheran chhuahsan vek turin a hriattir a, an ram embassy beihna chhan let nan British sawrkar chuan London-a Iran Embassy kharna thupek chhuahin Iran sawrkar mipawimawhte pawh darkar 48 chhunga United Kingdom chhuahsan vek turin a hriattir a ni.

Teheran-a an embassy beihnaah hian Iran sawrkar a inrawlh niin British Foreign Minister, William Hague-a’n a sawi a, Iran sawrkar-in mipui thinrim pungkhawm an hnawt darh zolo tia a sawi chu hnawh darh a tum tak tak loh vang niin a sawi bawk. Embassy khar chu Britain leh Iran inkungkaihna chhut chahna a ni kher lo tih pawh sawiin, boruak sosang zual tih daihna tumna a ni, a ti.

Germany, France leh Sweden-te pawhin British Embassy beih a nih duhloh entir nan Iran-a an ram palai-te an ko kir vek a, Italy pawhin an palai koh haw a tum thu leh Tehran-a an embassy pawh an khar mai theih thu a sawi a ni.