Boruak bawlhhlawh leh bengchheng awm lo

Kum hlui thlah zan leh Kum thar ni khan Mizoram hmun hrang hrangah boruak bawlhhlawh a tlem hle a, hriselna atana ṭhalo khawpa boruak bawlhhlawh leh bengchheng a awm lo a ni.

Mizoram State Pollution Control Board (MSPCB) thuchhuahin a tarlan danin Aizawl, Lengpui, Lunglei leh Champhai-ah te boruak bawlhhlawh dan hi nikum December ni 31 leh kumin January ni 1 khan teh a ni a. Boruaka bawlhhlawh leng vel chu ram pum huap (national standard) aia hniam vek a ni a, boruak tibawlhhlawha mihring hriselna tichhe thei Sulphur Dioxide leh nitrogen dioxide phei chu a awm zat hriat theih loh khawpin a tlem a ni.

Bengchheng tehnaah pawh chhunlaia sawrkar phal chin bengchheng tehna decibel 55 a nih laiin Aizawl-ah chuan decibel 46 chuang hret a ni a, zanah pawh sawrkar phal chin decibel 45 a nih laiin Aizawlah chuan decibel 36 chuang hret a ni. Pollution Control Board chuan hetianga tunhmaa boruak thianghlim loh lai ni ṭhin kumhlui thlah zan vela hetiang taka boruak a lo thianghlim ta hi lawmawm an tih thu an sawi a. Mizo mipuite pawh an hrisel phah sawt dawn nia sawiin sawrkar, police leh dan kengkawhtu dangte bakah mipui zirtirtu YMA leh thuthar thehdarhtute hna-thawh rah a ni, an ti bawk a ni.