Australian Open: Final- ah Sharapova leh Azarenka

Australian Open hmeichhe singles final turte a hriat theih ta a, a vawikhatna atan Victoria Azarenka chuan Grand Slam final lut turin Kim Clijsters a hneh a, S/f leh-lamah Sharapova chuan Petra Kvitova hnehin final a lut bawk.

Champion lai Clijsters hi Azarenka lakah 6-4, 1-6, 6-3-in a chak lova, Azarenka hian nikum khan Wimbledon s/f a lut a, kha kha tun tih lohah chuan Grand Slam-a a thlensan ber a la ni. Maria Sharapova chuan Australian Open final a luh vawithumna atan Petra Kvitova chu 6-2, 3-6, 6-4 in a hneh bawk. Fourth seed Sharapova hian 2008 khan he title hi a lo la tawh a, kum 4 hnuah hian a champion leh thei ang em? Hmeichhe singles final hi naktuk Inrinnah an khel ang.

Mipa lamah nimin khan Rafael Nadal chuan Roger Federer 6-7, 6-2, 7-6, 6-4-a hnehin Final a lut a, Nadal hian vawiin-a Novak Djokovic leh Andy Murray te inkhela a chak zawk zawk a hmachhawn ang.