Ni 3 awh tur Mumbai International Film Festival hawng

Parliamentary Secretary to Chief Minister Pu Lal Thanzara chuan Mumbai International Film Festival Aizawla nithum chhung nghah tur chu nimin chawhma khan I&PR Auditorium-ah a hawng.

Pu Lal Thanzara chuan film chan leh siamchhuah te hi Mizo te zingah thil tharlam a ni bik lova, 2004 velah phei kha chuan mizo film a lar hman viau a. Amaherawhchu, a lemchan thu ah te, endik leh hmanraw hrang hrang thiamthil lamah tlakchham a la awm avangin duh angin hma a sawn chak thei lo a ni, a ti a. Khawvel hmun dang te pawhin an tawn, film in ruksak leh phalna mumal neilova inthehdarhsak te chu a thanmawhbawk an ni bawk, a ti. Parliamentary Secretary chuan Film lama thangtharte theihna leh tuizia hria in Mizoram Sorkar chuan kum kalta atang khan Mizoram sumpaiah an bultan nan cheng nuaisawm a bithliah a ni, a ti a. Aizawl-a IIMC Centre hawn te, MZU ah Mass Communication zirtheih a ni ve ta te hian Film lama hmasawnna namenlo a thlen ngei a beisei thu a sawi lang bawk. Tunlai khawvelah Television te chu ennawm satliah thlirna ni tawh lovin mitinte tana mamawh bengvarna thlentu leh thil tangkai a ni tawh, a ti a. Film Festival a pholan turte pawh hian mihringte kaihhruiana dik pe in thil tha zirchhuah nan hman a beisei thu a sawi.

Nimina Film Festival hawnna hi I&PR Director Pu Jim K. Chozah chuan a kaihruai a, Film Division of India, Kolkata Branch Manager Pu Sumay Mukherjee chuan a tobul a sawi. Nithum chhung Film Festival hi chawhnu dar 1:00 atanga dar 3:00 inkar ah I&PR Auditorium ah neih thin tur a ni a, Documentaries leh Animated film hrang hrang entir niin a duh apiangin thlir theih a ni ang. Vawiina Festival hawnna ah hian ‘Little Terrorist ‘ tih film chhuah a ni a. He film hi Oscar award dawng pha tur zingah chhawpchhuah ve phak a ni. Festival khar ni, April 27-ah chuan tunlai mizo film lar tak ‘Zodinpuii’ chhuah a ni ang. Sawrkar laipui Film Divsion hian Mumbai International Film Festival kum hnih dana an neih thin chu state hrang hrangah a chhawpchhuak ve thin a, tun tuma Aizawl-a neih hi Mizoramin a thlen ve vawi khatna a ni.

Leave a Reply

Your email address will not be published. Required fields are marked *