England-ah Manchester United an Champion

Manchester United chuan an history a a vawi 20-na atan English Premier League-ah an champion ta a. Manchester United hian Thawhṭanni zan khan Aston Villa mikhualin 3-0-in an chak a, Robin Van Persie chuan hattrick a siam nghe nghe a ni.

Pathianni zanah Tottenham-in Manchester City an hneh tawh avangin United hian champion thei dinhmuna ding chungin Aston Villa an mikhual a, an khelhna hmun hi Old Trafford a nih avangin chak ngei an tum ruh hle a ni. Hetih lai hian Aston Villa pawh Relegate mai thei dinhmuna an din avangin chak an mamawh hle bawk.

Ṭan phat aṭangin United an chungnung nghal a, second 83 na lekah Robin Van Persie chuan goal thunin hma an hruai nghal a. He goal hi Wayne Rooney bul ṭan, Antonio Valencia cross Ryan Giggs-a’n Van Persie tan a pek a lo thun a ni. Hemi hnu pawh hian van Persie bawkin chance tha hmu lehin a thun lo a, Rafael chuan post a pet per bawk. Villa lamin insiam rem tumin Benteke chuan chance ṭha tak mai a nei a, heta ṭanga ball kal zel chu Rooney chuan counter-attack ropui lutuk ṭan pheiin, a kângin van Persie a pe phei a, he Dutch striker hian minute 13 ah mawi takin a lo volley goal. He goal hi a ropui chungchuang hle.

Hemi hnu hian minute 31 na ah Shinji Kagawa pass chu Ryan Giggs chuan dawngin amah pawhin thun thei reng mah se van Persie tan a siam sak a, a thelh lo chiang hle. Minute 31 lekah hattrick a siam der mai. Hemi hnu hian Villa chuan tho leh tur hmel an pu tawh lova, kawng engkimah United chungnung zawkin huntawp a thlen meuh chuan point 16 laiin an sang fal ta a, anmahni hnaih bertu Manchester City in vawi 5 khelh tur la neiin chak vek pawh nise point 15 chiah an hmuh theih tawh avangin Manchester United chu an champion chiang ta a ni.

Tun ṭum hi Old Trafford-a Premier League title an lak ṭum 4-na a ni a, kum 1999, 2002 leh 2009 khan Old Trafford-ah title an lo la tawh a, Old Trafford hi Premier League title lak tamna ber khelmual a ni nghe nghe a ni.

Tunah hian match 4 khelh tur an la neihin title an la a, 2001 khan match 5 khelh tur la awmin title an la thei a, title an lak tawha anmahni hnaih bertu nena an point inkar zauna ber chu kum 1999-2000 khan niin, point 18 ngawta falin title an la a ni.

Manchester United striker Robin van Persie chuan League Title a lak hmasak ber hun tawn chu a career chhunga a hun tawn mak niin a sawi hial a. Van Persie hi Player tha a ni a. Arsenal a khelh lai pawhin player pawi-mawh ber a ni a. Mahse tuna a tophy chawi tur hi a career a a vawi thumna tur chauh ala ni a, UEFA Cup leh FA Cup te chauh a hma khan a la la a ni.

Hetihlai hian Manchester United, goalkeeper, kum 22-a upa, David de Gea erawhchuan UEFA Europa League, UEFA Super Cup, UEFA European Under-21 Football Championship , UEFA European Under-17 Football Championship, UEFA European Under-21 Football Championship, Team of the Tournament, FA Community Shield bakah Premier League title a la ta a ni

Leave a Reply

Your email address will not be published. Required fields are marked *