Congress Ṭhalaiten Martar thlanah ruhro phûm

Nimin chawhnu dar 2 khan CTI Sesawng-a Martar Thlan-ah Sgt. Lalduha s/o Duatbera ‘K’ Bn. No.220145, ni 4.7.1970-a kahhlum tak, Thingkah khaw ruang chu Mizoram Pradesh Youth Congress Committee-te chuan Mizoram Martar Family Association-te duh danin an phum.

Sgt. Lalduha, kum 21, ruang hi CTI Sesawng Martar Thlana phum hmasak ber a ni a, phumna inkhawmah hian Congress Thalai President C.Lalawmpuii chuan thusawiin, “Kan party President Pu Lal Thanhawla’n ram leh hnam tana nunna pe te a zah em em a, chutiang chuan keini pawhin kan zahin kan ngaihlu a, vawiinah chu kan zahna chu a takin kan lantir a ni,” a ti a.”Sgt. Lalduha hi a thih hian kum 21 mi chauh a ni a, ani aṭang hian Mizo thalaite hian ram leh hnam tana kan inpeknaah chona nasa lehzual kan nei a ni,” a ti bawk.

Ruhro phum inkhawm tawiah hian Mizoram Martar Family Association Vice President Ngursailova Sailo chuan “Martar Family Association hian ngun taka an ngaihtuah hnu-ah Sgt. Lalduha ruh hi CTI Sesawng Martar Thlana phum an rel thlu ta tih a sawi.

Congress Thalai hruaitute chuan MNF-in Martar-te an ngaihthah em avangin kum 1997 June ni 27 khan CTI Sesawngah hian Martar Thlan an siam a, MNF an rawn sawrkar khan he thlan hi sawrkarin ring nghal mai tura an ngen laiin a hranin sum tam tak sengin Luangmualah an siam leh ta tho a ni tih an sawi.

Sgt. Lalduha ruhro hi kum 4 liam ta vel khan Lunglei leh Chawngte inkar Hmunmawiah thuk lo te-in an phum tih hriat a ni a. A ruhro hi la chhuakin Aizawlah April ni 10.2013 khan kawngzawhpui a nih hnu-ah nimin khan phum a ni ta a ni.

Martar Family-te chhut danin rambuai lai khan Mizo nunna chan mi 2057 vel an awm.

Comment ( 1 )

  1. HRIATA CHHANGTE

    District tinah Martar thlan kan nei mai dawn…. Fashionable deuhvin Mizoram buai a Mizo sipaite ngaihsan thar leh thut hi Mizo-na ah thukna ah kan ngai dawn anih chuan….

Leave a Reply

Your email address will not be published. Required fields are marked *