MSCPCR-in Naupangte hamṭhatna chungchang Department hotute a sawipui

Mizoram State Commission for Protection of Child Rights (MSCPCR) chuan nimin khan Department hrang hrang hotute naupangte hamṭhatna tur leh an chanvo an chan theihna tura ṭanho dan tur a sawipui.

Aijal Club Conference Hall-a neih, Sensitization Workshop for Head of Dept tia vuah hi MSCPCR Secretary Lalsangpuia’n a kaihruai a, MSCPCR Chairperson Sangzuali Vanchhawng chuan naupangte chu mahnia inveng ve thei lo an nih avangin Dan chi hrang hrang hmangin an dikna leh an chanvo humhalhsak an ni a, chung Dan dinglaite chu a nihna ang taka kengkawh thei turin a kaihhnawih Department hrang hrangten an hmazawna tih tur awm ṭheuhte ṭha taka an hlen chhuah a ṭul a ni a ti a, Sawrkar Department tinah naupangte khawih hmalakna a awm zel a, sawrkarin policy leh programme a duan te pawh naupangte dikna leh chanvo humhalhna nena inmil, an hmasawnna tur lam hawi a nih a ṭul a ni a ti.

Sangzuali Vanchhawng chuan hursualna laka naupangte humhimna dan POCSO Act 2012 chu dan khauh tak a nih thu sawiin, hursualna lam hawia naupangte chunga pawikhawihna a lo thlenin inngaihdam a awm ṭhin chu a tuartu tan pawi nasa zawk thlentu a ni ṭhin tih a sawi a, pawikhawihtu hrem ngei chu a tuartu tih damna kawnga rahbi hmasa ber leh thil pawimawh ber a nih avangin pawikhawihtute chu hrem ngei tur an ni a, inngaihdam chu Danin a phal lo a ni a ti.

Sawihonaah hian MSCPCR Member pathum, Dr Julie Remsangpuii Fambawl, K.Malsawmzuali leh J.Malsawmzuala Vanchhawng te pawhin thu an sawi a, sawihona-a tel, Mizoram Police aiawhte tarlan danin, naupang kum tling lo dan kalha che te tan Police Station tinah Child Friendly Corner siam tum a ni a, tunah hian Police station tam takah zawhfel tawh a ni. Naupangten an hlimna leh an lungawi lohna ziaka an dah theihna tur Happy/Sad Box pawh zirna in hrang hranga dah turin Police te chuan hma an la bawk a, naupang dan kalha che te chungchang ngaihtuahtu tur Special Juvenile Police Officer pawh Police Station leh Out post tinah ruat an ni a, kum 18 la tling lo, dan kalha che te hming leh an nihna puanzar khapna pawh ṭha taka zawm turin Police Station tinah hriattirna tih chhuah a ni tawh bawk.

Health Dept lam aiawha tel te chuan hursualna lam hawia pawikhawihna tuartu naupangte damdawi in-a endikna kawngah hmasawnna tur la awm ang ang te bawhzui zel an inhuam thu an sawi a, Law and Judicial lam aiawha tel chuan District hrang hrangah a tahtawlin Child Friendly Court siam chhoh zel tum a nih thu an sawi bawk.

Naupang zawng zawng khua leh tui ṭha-a an lo puitlin chhoh theihna turin anmahni venhimna kawngah leh enkawl-na ṭha zawk an dawn theihna turah te a ṭul apiang bawhzui an inhuam thu Depart-ment aiawhte chuan an sawi hlawm a ni.

About Editor

C.Lalrochhuanga, New Serchhip, Serchhip - 796181 Mizoram Contact: 8974286711

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.