Governor-in Mizorama thlawhna service chungchang Union Aviation Minister a sawipui

Tun thla tir lama Jet Airways-in Mizoram an chhuah-san avanga mipui harsatna sutkian dan zawngin Governor Kummanam Rajasekharan chuan Delhi-ah Union Aviation Minister leh Aviation thuneitu sâng te chu Thawh-ṭanni khan a kawm a, he inkawmnah hian Mizoram Governor ngenna angin Union Aviation Minister Suresh Prabhu chuan Thlawhna service indaihlohna avanga Mizoram mipui harsatna chu a rang lama chinfel a tiam a ni.

Thlawhna service tlem ta thut avanga mipui harsatna leh mipui mamawh Mizoram Governor in a thlen chu Union Aviation Minister Suresh Prabhu chuan ṭha takin a lo dawngsawng a. Mizo mipuite harsatna sukiang turin theihtawp a chhuah tur thu leh Thlawhtheihna hmanga inkalpawhna changtlung zawk Hmarchhak bialchhunga chhawp chu sawrkar thil ngaih pawimawhber pakhat a nih thu a lo sawi a ni.

Tunhnaiah Jet Airways-in Mizoram an chhuahsan avang-in state mipui ten Guwahati leh Delhi pan turin harsatna an tawk nasa tih Governor chuan Aviation thuneitute hi a hrilh a, State dangte nena Inkalpawhna ṭha tawk lovin awmloh avangin Mizoram chu hmun kilkhawraha awm nia sawiin, Delhi dawr zung zung pawh an harsat phah tel bawk nia a hriat thu te pawh a sawi bawk a ni. A bik takin damlohna avanga phai lam pan ngai damlo te tan Thlawhna Service a chatlak ta chu a pawi leh zual bik a. Tunah pawh Damlo chhungkaw tam takin harsatna an tawk mek a ni a ti. Aizawl leh Guwahati inkar bakah Aizawl leh Delhi inkarah thlawhna service pangai a awm leh theihnan Air India chu Thlawhna Service dahbelh tir leh turin Aviation hotute hi a ngen a. Air India bakah Thlawhtheihna Service Company dangte pawh Mizoramah an rawn luh theihnan Union Aviation Minister chu hma la turin a ngen nghal bawk a ni.

Governor leh Union Civil Aviation Minister te inkawm-naah hian Ashwini Kumar Lohani, Secretary, Ministry of Civil Aviation leh Usha Padhee, Joint Secretary, Ministry of Civil Aviation te pawh an tel a. Ashwini Kumar chuan Thlawhna Service indaihlohna avanga Mizoram harsatna chu sawrkarin a hriat thu a sawi a. Thlawhna Service Company dangte pawh Mizoramah an rawn luh theih nan lo kawm pawh an thil tum mek a ni a ti. Ministry of Civil Aviation leh Thlawhna Service Company zawng zawngten meeting an neih thuai tur thu a sawiin he hunah hian Mizoram a Thlawhna Service dahbelh chungchang pawh sawi chhuah a ni dawn a ni a ti a. Tun dinhmunah, Indigo chuan Agartala leh Aizawl inkar thlawk thin turin an inpeihfel thawkhat tawh a ni a ti.

About Editor

C.Lalrochhuanga, New Serchhip, Serchhip - 796181 Mizoram Contact: 8974286711

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.