Pre World Cup Paragliding Accuracy Championship tan

SERCHHIP: Pre World Cup Mizoram Open Paragliding Accuracy Championship 2018 chu nizan hmasa khan Serchhip Auditorium-ah Dr. C.Vanlalramsanga, Secretary, UD&PA chuan khuallian niin a hawng.

Hawnna thu sawiin, Dr. C.Vanlalramsanga chuan Mizoramin he paragliding championship-a Glider/Pilot te tan Infrastructure leh Accomodation tha chhawpsak thei lo mahse duhsakna a hlan thu a sawi a, India ram state hrang hrang leh ramdang 9 atanga Glider/Pilot kal khawm te chuan inunauna leh inthianthatna he Championship atang hian nei tura chahin, Paragliding-ah kher nilo, Adventure Sport dangah pawh Mizoram chu hrereng turin a chah a. Khuallian chuan he Championship, khawvel pumhuapa lian Mizoramin a thlen theihna tura hmalatu leh buaipuitu Mizoram Aero-Sport Association (MASA) hruaitute leh Serchhip mipuite hnenah lawmthu sawiin, Mizote chu Pathianin talent tha tak tak a pe tih sawiin, tunhnaiah Hockey leh Ritchawi (Weightlifting)-ah te khawvel hriatin an chetha a, he Pre-World Cup Mizoram Open Accuracy Championship 2018-ah pawh hian Mizo Pilot engemawzat tel te chu duhsakna a hlan bawk a ni.

He hunah hian J.Vanlalliana, President (MASA) chuan intihsiaknaa hriattur pawimawh hrang hrangte leh he Competition-a point hmu thate chu National Ranking atana an point score-na a nih tur thute bakah report tul dangte ngaihthlak a ni a, zaithiam zai te ngaihthlak a nih bakah Serchhip Sub-Hqrs YMA Cultural Troop ten Mizo Hnam Lâm an entir bawk a ni.

Serchhip leh Keitum inkar, National Highway-54 chung lam Bawngchawm ram, DapzarKawn-a Glider/Pilot te tlawh chhuahna hmun tur atana buatsaih atanga thlawk chhuak tanin, intihsiakna hi neih a ni a, Glider/Pilot te hi Zawlpui-a Sailopara Leilet zawla tumna tur hmun an siama tum fuh tumin intihsiakna hi an bei a, he intihsiaknaa tel tur hian khawvel ram dang atang pawhin Glider/Pilot an rawn kal a, intihsiaknaah hian pilot 52 an tel a, anni bakah hian intihsiaknaa tel lo hi mi 20 vel an rawn kal tel bawk a, intihsiaknaa tel te hi intihsiak chhungin mi pakhat hi vawi 5 vel zel an thlawk thin a, mahse tun tumah chuan pilot an thathnem avang leh a hun chhung a rei loh avangin a thlem thei ang ber vawi 3 vel theuh an thlawh rin a ni a, he intihsiakna hi Fédération aéronautique internationale (FAI) hriatpuina niin, a endik tur pawh Slovenia leh Japan atangin an lo kal a, he intihsiaknaah hian Mizo glider/pilot te pawh an tel a ni.

Pre-World Cup Paragliding Accuracy Championship hi mipuiin an hlut hle a, nimin pawh khan an thlawh chhuahna Dapzarkawn leh an tumna hmun Zawlpuiah te entu mi engemawzat an kal a, Inrinni khian zawhfel tum a ni.

 

About Editor

C.Lalrochhuanga, New Serchhip, Serchhip - 796181 Mizoram Contact: 8974286711

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.