Sawrkar hmalakna vangin mipuiten Congress-ah rinna an la nghat:James Thanghmingmawia, Chairman, MPCC Media Deptt.

Mizoram Pradesh Congress Committee (MPCC) Media Department Chairman Pu James Thanghmingmawia chuan “Congress sawrkar hmalakna avangin mipuiten Congress-ah rinna an la nghat a, boruak kan thlirin kan la sawrkar leh ngei dawn a ni,” a ti.

He thu hi nimin chawhnu dar 1:30-a Serchhip Cable Network Studio-a Serchhipa thuthar lakhawmtute an kawmnaah MPCC Media Department Chairman hian a sawi a, Pu James Thanghmingmawia chuan MPCC President leh Chief Minister ni bawk Pu Lal Thanhawla Serchhip mipuiten an thlan tlin ṭhinnaah lawmthu sawiin, Ser-chhip chu MLA Constituency dangte aiin malsawmna leh duhsakna an dawng niin a sawi a, District-ah pawh a changtlung pawl tak a ni tih sawiin, Ser-chhip District lo pian chhuah chhan pawh tuna Chief Minister ni mek, Pu Lal Thanhawla vang a ni tih a sawi. Heng bakah hian Tui chungchangah Serchhip chu Congress zarzo hmasa an ni tih sawiin, tunah hian Serchhip Sports Complex-ah nasa taka hmalak a ni a, Mizo-ramah pawh Hall ṭha ber pawl Serchhip-in a nei tawh a, Zawlpui phaia kawng ṭha tak siam a ni te chu Serchhip economy atana pawimawh tak a ni a ti a, “Heng hmasawnna zawng zawng te hi in bialtu MLA, Pu Lal Thanhawla in thlantlin ṭhin vanga Serchhip mipuite thawhrah a ni,” a ti bawk.

Congress Party chuan inthlan hrang hrangah hnehna a chang chho zel tih a sawi a, chutihlaiin nimina result tihchhuah, Chakma Autonomous District Council (CADC) inthlanah erawh an beisei a sân loh ang takin an chak lo tih a sawi a, hei hi a chhan chu an party chhungkua boruak avang tih a sawi a, an beisei aiin MDC an nei tam zawk tih a sawi a, MLA inthlanah erawh CADC huamchhungah hian hnehna an chan ngei an rin thu leh tuna an chak lo chu an ṭhat lutuk zawk vang niin a sawi.

A sawi zelnaah, kum 10 chhungin an intiam ang te an tihlawhtling tih a sawi a, NLUP chu chhungkaw 135189 pek an ni tawh a, tunah hian MLA Con-stituency tinah chhungkaw 400 ṭheuh pek leh tum a ni a, a ṭhen chuan an thlangfel tawh a, thlang mek an la awm bawk tih sawiin, NEDP hnuaiah pawh kawng hrang hrangin hmalak a ni tih a sawi a, “Congress sawrkarah hmasawnna a ‘chhuṭi’ nia sawi chu rinthu leh ṭawngvai sawi mai mai a ni,” a ti a, Congress sawrkarin hmasawnna hna a thawh te mipuiin an hria a, sawrkar thlâk duh ngawih ngawih-na a la awm lo a ni, a ti bawk.

He huna tel ve MPCC Media Department Secretary, Pu David M.Thangliana chuan iFUND sum cheng vaibelchhe 539 hmangin Mizoramah kum 6 chhung hna thawh a ni dawn a, hna thawhna tur hian District pali – Serchhip, Mamit, Kolasib leh Champhai te thlan a nih thu a sawi bawk.

Tunhnaia MNF Serchhip East Block-in an sawi, NLUP vawk note supply chung-changa tualchhung vawk note lei lova, hmun dang aṭanga supply a nih chhan zawhna chu hmun dang aṭanga supply a ni tih a hriatloh thu Pu James Thanghmingmawia chuan a sawi a, hruaitu dangte chuan tualchhung vawk note duhkhawp lei tur a awmloh thu an sawi bakah, tualchhung vawk note awmzât survey a nih chhung leh a sem hun inkar a hlat avangin survey laia vawk note zat chu a rintlak loh niin an sawi.

He hunah hian MPCC Media Department hruaitu te bakah Serchhip Congress Block treasurer Pu Lalthangliana te an tel a ni.

About Editor

C.Lalrochhuanga, New Serchhip, Serchhip - 796181 Mizoram Contact: 8974286711

Leave a Reply

Your email address will not be published. Required fields are marked *