Serchhip Sub-Hqrs. YMA Conference ṭan

Serchhip Sub-Hqrs. YMA Conference vawi 6-na chu nizan aṭang khan Serchhip Auditorium-ah neih ṭan a ni a, nizan khan Palai lawmna neiin vawiin ah rorelna leh hruaitu thlanna neih a ni ang.

Serchhip Sub-Hqrs. YMA Conference vawi 6-na ah hian Thupui atan ‘Ram leh Hnam humhalh’ tih hmangin nizan khan Palai lawmna inkhawm neih a ni a, he hun hi Sub-Hqrs. Vice President, Pu Kawlṭhuama chuan kaihruaiin, Sub-Hqrs. YMA Asst. Secretary, Pu PC Vanlalluna chuan Palai lawmna thu a sawi a, Pu Lalrammawia, Secretary hnen aṭangin report ngaihthlak niin Report aṭanga a lan danin Serchhip Sub-Hqrs. YMA hnuaiah hian Group YMA 3 awmin Branch YMA 72 a awm a, Sub-Hqrs. YMA hnuaiah hian Committee peng hrang 11 awmin heng Committee hrang hrangte hmalakna pawh tarlan a ni bawk.

Nizana Sub-Hqrs. YMA Conference-ah hian khawmpui hmasa lamin a lo rel tawh angin Sub-Hqrs. YMA huamchhunga Fa nei tam mi 3 te hnenah chawimawina hlan a ni a, heng chawimawina dawngtute hi Pu Vanlalhuma te nupa, Bungtlang Vengsang; Pu K.Lalduhawma te nupa, Zote South leh Pu K.Lalthanpuia te nupa, Sialhau te niin heng mite hnenah hian chawimawina leh lawmpuina pawisafai `3000/- leh thuziak hlan an ni a, Fa nei tam chawi-mawina hlan te hi Serchhip-Sub-Hqrs. YMA Conference vawi 5-na, Zote South-a nikum hmasa a neih hnua fa 6-na aia tam hring leh te an ni a, hei hi Mizo mipuite kan lo pun lehzual theihna tura ruahman a ni.

Sub-Hqrs. YMA Conference neih mekah hian vawiin chawhma lam hian khawmpui rorel inkhawm neih a ni dawn a, hetah hian YMA member boral te sunna hun hmangin kumthar atana Sub-hqrs. YMA Budget pawh pharh nghal a ni ang a. Chawhnu lamah kum 2018-2020 chhunga Sub-Hqrs. YMA hruaitu tur thlanna neih nghal a ni ang. Zanin ah a hmun ngaiah Palai thlahna inkhawm neih zui a ni dawn a, hetah hian Central YMA Asst. Secretary, Peter Chhakchhuak chuan khawmpui thupui, ‘Ram leh Hnam humhalh’ tih hmangin thu a sawi bawk ang.

Serchhip Sub-Hqrs. YMA Conference hmang tur hian Sub-Hqrs. YMA huamchhung aṭangin Palai ṭhahnem tak an rawn tel a, he thu buatsaih lai thleng hian Palai thlen dan kimchang erawh hriat theih a ni lo a, Vawiin lam hian khaw chhehvel aṭangin Palai ṭhahnem tak rawn tel leh tura beisei an ni bawk.

About Editor

C.Lalrochhuanga, New Serchhip, Serchhip - 796181 Mizoram Contact: 8974286711

Leave a Reply

Your email address will not be published. Required fields are marked *