CADC-ah MNF leh BJP-in sawrkar inṭawm siam tum

Chakma Autonomous District Council (CADC) inthlanpui result puan a nih hnuah MNF leh BJP in sawrkar inṭawm siam turin hma an la mek.

CADC inthlanah hian MNF Party chuan seat la tam berin MDC seat 8 an la a, INC-in seat 6 lain, BJP-in seat 5 an la a, Party mala sawrkarna siam thei an awm loh avangin MNF leh BJP chuan sawrkar inṭawm siam an tum a ni.

Hemi chungchangah hian MNF President Pu Zoram-thanga chuan nimin khan Hnam Runah chanchinbumite a kâwm a, Pu Zoramthanga chuan CADC inthlana tling tam ber MNF chuan seat 8 changin party mal angin sawrkarna siam thei lo mahse NDA a an awmpui Seat 5 latu BJP nen an thawhho tur thu a sawi a, thawk ho turin MNF leh BJP tan chuan Congress thawhpui chi an ni loh thu sawiin, tunhnaia Congress Party in CADC sum cheng vaibelchhe tel tiboa , Governorin Accountant General a chhui tir hial avangin thawhpui enah Congress chu an en loh thu a sawi a ni.

Chanchinbu mite zawhna chhangin MNF President chuan CEM turah engmah tihchian a awm loh thu leh CEM chu Legislator ten an thlan tur a nih thu a sawi a. Kalphung ang chuan a tling tam zawk chuan CEM chu an chan tur anga ngaih deuh chu a ni a ti bawk.

BJP President Dr. JV Hluna pawhin thawhdunna tur chungchang hi AIR hrilhin, Congress-in thawhdunpui atan a hnenah palai an tir vat naa Central lama an hotute’n Congress nena thawhdun chu rem an ti lo, a ti a. Helaiah MNF nen inbiakna nei lo mahse MNF hotute’n an biak tur thu leh vawiin lama BJP hotute hnena an kal tur thu a sawi a ni.

Hetihlai hian Chawngtea cham mek Congress CLP Treasurer Pu Zodintluanga chuan CADC-a rorel mek Congress party chuan tichhe lutuka an inhriat loh thu a sawi a, an beisei ang an phak tak lohna chhan ber chu inthlan puan a nih hma chiaha Governor-in CADC sawrkar ṭhiata Governor’s Rule a puang chu a ni, a ti a, sawrkarna siam tura hma lak a nih dawn leh dawn loh thuah chuan Headquarters lama hotute thu an ngaihchan dawn thu a sawi a ni.

CADC inthlana Vote tlate hi vawiin khan Chawngte SDO (Civil) office-a counting hall pahnihah chhiar a ni a. Returning Officer Pu N. Chakhai chuan MDC constituency 20 zinga inthlan kalpuina bial 19-a vote hmu sang berte theuh chu tlingah a puang nghal a, CADC-a MDC bial 20 awmah Fultuli constituency-a inthlan result chu High Court order-in a stay rih a, MDC bial 19-a polling station 66-ah inthlan hi kalpuiin vote nei zawng zawng 29,444 aṭanga mi 27,038-in vote an thlak a, vote tla hi zaa 91.83 a tling a ni.

Vote chhiar chungchang-ah hian bial 11-ah Complaint a awm a, an chhiar nawn vek a, result danglam erawh a awm lo a ni.

CADC inthlanah hian inhnehna sang ber chu Parva bialah a ni a, INC candidate Mohan-a chuan amah hnaih bertu BJP candidate Prityrup Chakma chu vote 314-in a hneh a. Vote inthlauhna hniam ber chu Mondirasora bialah a ni a, INC candidate Onish Moy Chakma chuan amah hnaih bertu BJP candidate Lokhi Dhan Chakma chu vote 6-in a hneh a ni. Bial 19 zingah hian Borapansury-II bialah chuan BJP hmeichhe candidate Kusum Lota Chakma thlan tlin a ni.

CADC-ah hian MDC ni lai mi 17 chu ding nawn lehin, mi 6 chu thlan nawn an ni a, mi thar 13 an tling bawk.

About Editor

C.Lalrochhuanga, New Serchhip, Serchhip - 796181 Mizoram Contact: 8974286711

Leave a Reply

Your email address will not be published. Required fields are marked *