Bilkhawthlira neih Mizoram UPC LAD Gen. Conference a ṭiak

Mizoram UPC LAD General Conference vawi 23-na, Zirtawpni kalta aṭanga Bilkhawthlir Playground a neih chu nizan khan an ṭiak ta.

Tun ṭum LAD General Conference-ah hian palai riak lut mi 1300 zet awmin, lânga kal mi engemawzât an awm bawk a, LAD General Conference hi kum 2018-ah Mamit-ah neih a ni dawn a, kum 2019-ah New Siaha-ah neih a ni ang.

Inrinni khan Unaunu Lalronungi, President, Gen. LAD kaihhruaina hnuaiah rorel inkhawm neih a ni a, Agenda lut 27 ngaihtuah niin, heng zingah hian Relief fund atana Rs.20,000/- dah ṭhin chu Rs.50,000 a tihpun nise an ti a, LAD Day-a tlai chawnghei ṭawngṭai a, zanriah ei ai Bethani Children’s Home puala dah nise tiin, Bethani Childrens Home puala member tinah Rs.20/- ṭheuh khawn nise an ti bawk. Hei bakah hianATI hmeichhe hostel sak chhunzawm nan Member pakhatah Rs.20/- zel khawn nise an ti a, Mihring hmanga sumdawnna (Human trafficking) laka Kohhran mipuite fihlim theih nan Gen. LAD-in hmalak nise an ti a, kum 2018 chhunga LAD ten ram pum huap nilenga ṭawngṭai neih te an pass a ni.

Gen.Secretary Report aṭanga a landanin Mizoram UPC hi Pastor bial 75 an awm mek a, LAD dinna khaw zat hi 336 a ni a. Tun ṭumah hian Bial report bial 72 aṭangin a lut a, heta a landan hian LAD member zawng zawng hi mi 8073 an ni a, LAD member tamna ber bial chu Aizawl Dinthar bial niin, member 319 an awm a, Aizawl Chawlhhmun chu pahnihna niin, member 290 an awm bawk a, Aizawl Bethlehem bialah member 271 an awm mek bawk. Member tlemna ber bial chu Monughat niin, member 9 an awm thung a ni.

Conference leh Conference inkarah hian member boral 62 an nei a, buhfaiṭham no 730 ṭham chin chhungkua 950 an awm a, zuk leh hmuama fihlim tamna ber bial chu Aizawl Dinthar bial an ni a, thla tin chawnghei ṭawngṭai nei thei zat mi 53 an awm a, kumpuan thupui bawhzui thei bial 56 an awm bawk.

Nizan khan Unaunu Lalronungi, President General LAD hnen aṭangin Pathian thuchah ngaihthlak a ni a, Bethani Children Home Pualin thawhlawm lâkkhawm a ni bawk a, vawiin lamah palaiten an awmna lam panin an haw hlawm ang.

About Editor

C.Lalrochhuanga, New Serchhip, Serchhip - 796181 Mizoram Contact: 8974286711

Leave a Reply

Your email address will not be published. Required fields are marked *