Keiṭum khuaah bawlhhlawh bawm sem

Keiṭum khua chu pawnlera inthiar awm lohna, Open Defecation Free (ODF) khua an nih chhunzawm zel theihna tur atana hmalakna pakhat atan nimin khan PHE Department chuan Swachh Bharat Mission (Gramin) hnuaiah Keiṭum mipuite hnenah bawlhhlawh bawm an sem.

Keitum khaw chhungkaw tin hnena bawlhhlawh bawm sem pual hian Keitum Community hall-a inkhawm buatsaih hi Er. K.Lalrintluanga, SDO, PHED, Serchhip Sub-Division chuan a kaihruai a, he hun hmanpuitu Er. F.Lalsanglura, Sr.EE, PHED, Serchhip WATSAN Division chuan thusawiin, tui tel lovin mihring a nun theih loh va, tui tel lovin faina leh thianghlimna kalpui theih a ni loh tiin, mihringin kan rilru leh thlarau lama thianghlim nan Pathin thu kan mamawh a, kan rilru leh taksa faina tur pawhin tui chu kan mamawh a, tui hmanga thiang-hlimna leh hriselna tura beitu chu PHE te an nih thu a sawi.

Er. F.Lalsanglura chuan bawlhhlawh bawm an sem te chu fai leh hrisel tura pawnlera inthiar awm lohna tura bul ṭanna leh innawr kalna a ni a, a hlawhtlinna chu mipui kutah a awm a ni a ti a, khua a lo faia a lo thianghlim theih nan mimal tin te an pawimawh a ni a ti a, Er. F.Lalsanglura hian Keiṭum VCP Pu Vanlalsailova hnenah an khuaa cheng nuai 8 senga bawlhhlawh paihna hmun siamna tur Work order a hlan nghal a, Keiṭum khaw tana bawlhlawh paihna tur hi Keiṭum chhim lam, Bungtlang ep, tawlailir ṭhahnem tak dahkhawm-na bulah sak tura ruahman a ni.

Nimina bawlhhlawh bawm sem hi Pi PC Lianrengpuii, Sectional Officer chuan buaipuiin, bawlhhlawh bawm hi chhung-kaw 443 bakah zirna In hrang hrang 10 leh BNRGSK Hall ah te a vaiin 455 sem a ni a, he hun-ah hian Tv. Samuel Lallawm-zuala District Coordinator, SBM(G) pawhin thu a sawi a, Keiṭum VCP Pu Vanlalsailova chuan lawmthu a sawi bawk.

Bawlhhlawh bawm semna inkhawmah hian Keiṭum Community Hall khatin mipui an kalkhawm a, PHED Staff te bakah MJA Serchhip District hruaitute pawhin he hun hi an hmanpui a ni.

About Editor

C.Lalrochhuanga, New Serchhip, Serchhip - 796181 Mizoram Contact: 8974286711

Leave a Reply

Your email address will not be published. Required fields are marked *