ZPM Steering Committee Serchhip din

Nimin kan Serchhip Hmar Veng YMA Hall a Serchhip Zoram Exodus Movement (ZEM), Serchhip Block ZNP leh Serchhip Block MPC kalkhawm te chuan lungrual takin Zoram Peoples’ Movement (ZPM) Steering Committee Serchhip an din a, an hruaitu turte an ruat nghal.

Nimina ZPM Steering Committee hruaitu atan hian Chairman-ah Pu V.Rozamliana ruat a ni a, Vice Chairman-ah Upa Lalchhara leh Pu R. Zakapa, General Secretary-ah Pu Kapliana Pachuau, Joint Secretaries-ah Pu Zothanpuia, Pu B.Lalengmawia leh Pu Kawlhnuna, Treasurer-ah Pu Lalawmpuia Renthlei te bakah Committee Members atan mi 25 an ruat nghal bawk a, ZPM Steering Committee Serchhip hian Serchhip District a huam dawn a ni.

Nimina kalkhawm te hian ZPM Steering Committee Serchhip kaihhruaina hnuaiah Hrangturzo leh Tuikum Constituency huapa Steering Committee din thuai a nih theih nan hmalak nghal nise an ti a, ZPM Steering Committee Serchhip hruaitu thar hlanna hun a ranglama neih nise an ti bawk.

Serchhip ZPM Steering Committee chuan Serchhip District chhung khaw tinah leh Veng tinah ZPM Local Body a duh apiang tan din a phal a, an dinna Report leh hruaitu te chu Serchhip ZPM Steering Committee ah thlen zel tur a nih thu an sawi.

Kalkhawmte hian Resolution an pass nghal a, an resolution pass-ah chuan – Zoram tluchhe tawh siamṭhaa kalphung Thar – Mipui Sawrkar din tura a duh apiang tel theihna ZPM a lo piang ta chu lawmawm an tih thu an sawi a, Serchhip ZPM Steering Committee chuan a tawp thlengin a thlawp zel dawn tih an sawi a, Serchhip ZPM Steering Committee chuan Serchhip District chhunga Assembly Constituency 3 – Serchhip, Hrangturzo leh Tuikum Constituency-ah te Kum 2018 MLA General Election lo awm turah hnehna chan ngei tumin hma a la chho nghal dawn a, Candidate atan miṭha leh dik, Zoram siamṭhatna duhtu, Pathian ṭihmi te lo pen chhuak turin a sawm nghal a, Zoram siamṭhat duhtu apiang te zalen taka an tel theihna tur thawhhona huang – ZPM lo piang chu Zoram damna tura Pathian min pekah an ngai tih an sawi a, chuvang chuan ZPM kaltlanga Zoram siamṭhat hna thawk turin Zoram mipui zawng zawng te an sawm a ni.

About Editor

C.Lalrochhuanga, New Serchhip, Serchhip - 796181 Mizoram Contact: 8974286711

Leave a Reply

Your email address will not be published. Required fields are marked *