India rama a vawi khatna atan Aizawl-ah khawlaia bawlhhlawh paihten fine dawn

UD&PA, Sports etc Minister Pu Zodintluanga chuan India rama a vawi khatna atan Aizawl khawpui hmun hrang hrangah bawlhhlawh khawlai a paihten pawisa chawi zel tawh tura ruahmanna siam a nih thu a sawi.

He thu hi National Service Scheme (NSS) Foundation Day vawi 49-na lawmna prog-ramme-a a sawi a ni a, NSS Foundation Day lawmna hi nimin zing dar 8 khan AR Ground-ah neih a ni a, khuallian Pu Zodintluanga chuan NSS hnuaia ṭhalai zirlai te hnathawh chu chhuanawm a tih thu a sawi a, Mizoram hi state fai ber ni turin hmalak mek a ni tiin hemi kawngah hian NSS-te an pawimawh hle a ni, a ti a. Mi harsa leh damlo ten an hman ṭangkai theih nan thisen NSS-in an pe ṭhin chu lawmawm a tih thu a tarlang a. Bawlhhlawh paih te pawisa chawitir (Littering fine) kalpui-na turah pawh hian NSS-in an thawhhlawk hle dawn a ni, a ti a, kalkhawm zirlaite chu tifaitu piah lamah tibaltu nilo turin a chah a, Minister chuan an hnathawhna leh hmalakna hrang hrang ṭha taka chhun-zawm zel turin NSS chu duh-sakna a hlan nghal bawk a ni.

Foundation Day pual hian Aizawl khawpui-a kawngpui pawimawh hmun nga (5) NSS volunteer-te hian an tihfai hnuin AR Ground-ah an kalkhawm a ni.

National Service Scheme (NSS) hi September Ni 24, 1969 khan din ṭan niin, tun dinhmunah hian India ram pumah NSS Volunteer nuai 40 vel an awm mek a. Mizoram-ah chuan kum 1972 khan Pachhunga University College (PUC)-ah din a ni a. Kum 1996 atang khan Higher Secondary School-ah din tan a ni bawk. Tun dinhmunah hian Mizoram pumah College 26 leh Higher Secondary School 54-ah NSS hi an awm mek a ni.

About Editor

C.Lalrochhuanga,
New Serchhip, Serchhip – 796181
Mizoram
Contact: 8974286711

Leave a Reply

Your email address will not be published. Required fields are marked *