E.Bungtlang-ah bawlhhlawh bawm 451 sem a ni

Cheng nuai 10 senga bawlhhlawh paihna siamna tur Work Order Bungtlang VWSC hnenah hlan nghal a ni

Nimin khan PHE Department-in a kalpui Swachh Bharat Mission (Gramin) chuan E.Bungtlang-ah Nation Wide Sanitation Campaign (Swachhta Hi Seva) neiin chhungkaw tin bakah School leh vantlang ina dah tur Bawlhhlawh bawm 451 an sem a. hemi rual hian Er. F. Lalsanglura, Sr. EE, PHED, Serchhip WATSAN Division chuan cheng nuai 10 senga E.Bungtlanga bawlhhlawh paihna siamna tur Work Order chu Pu J.Lalhmuakliana, Chairman, Village Water & Sanitation Committee, E.Bungtlang hnenah a hlan nghal bawk.

He hun hmanpuitu Er. F.Lalsanglura chuan thusawi-in, kohhranin chhûng lam thianghlimna a kalpui laiin Swachh Bharat Mission chuan pâwn lam thianghlimna a kalpui a ni a ti a, PHE Department hi mipui vantlang hriselna (Public health) kalpuitu a nih angin thianghlimna atana pawimawh ber tui lak hna a thawk ṭhin a ni a ti a, tui hi thianghlimna atan a pawimawh avangin kan tui hnarte kan humhalh a, in lam mai bakah ram lama kan tui te khâwlna atan kan ram ngaw te humhalh a ṭul hle a ni, a ti.

Er. F.Sanglura chuan kan bawlhhlawh leh zun leh êkten tui a tih bawlhhlawh ṭhin avangin hemi kawngah hian kan inthiar fihlim a ngai a ni a ti a, thianghlimna nei turin khawtlang hruaitu te ringawtin an thawk thei lova, khawtlang mipui ṭanrual a ngai a, hetihrual hian VC te pawhin khauh taka hma an lak pawh a ṭul a ni a ti bawk.

He huna thusawitu dang Pu J. Lalhmuakliana, Chairman, VWSC chuan khawtlang vawnfai chu mipuite thil tih a ni a, khawtlang vawnfai kawng-ah mipuiten hma la chhunzawm zel se a duh thu leh bawlhhlawh bawm an sem chu a nihna ang taka hmang turin a dawngtute chu a chah a ni.

Er. K.Lalrintluanga, Sr. SDO, Serchhip WATSAN Sub-Division kaihhruai inkhawmah hian hall khatin mipui an kal khawm a, chhungkaw 436 hnenah bawlhhlawh bawm an sem bakah Anganwadi 7, Primary School 4, Middle School 2, High School pakhat, Higher Secondary School pakhat bakah VC House leh Bazar Branch YMA Library-a dah tur nen, a vaiin 451 sem a ni a, he hun hmanpui hian Serchhip aṭangin PHE Department thawktute leh thuthar lakhawmtute an kal a ni.

About Editor

C.Lalrochhuanga,
New Serchhip, Serchhip – 796181
Mizoram
Contact: 8974286711

Leave a Reply

Your email address will not be published. Required fields are marked *