Tun thla chawlhkar thumnaah HPC(D) biak chhunzawm tum

Mizoram sawrkar leh HPC (D) palaite inbiak chhunzawmna hun atan tun September thla chawlhkar thumna ruat chhin a ni.

Home department Additional Secretary Pu Lalbiak-zama sawi danin sawrkar leh HPC (D) aiawhte hi Aizawl-ah ni 2 chhung inbe tura ruahman a ni a. Tum lawk dan chuan official level-a inbiakna hi a hmawr bawk fel hman a, a dawt leha inbiakna chu political level-a hlan kai tura ruahman a ni a. Tun tuma an inbiakna-ah hian official-a sawi theih chin an chingfel hman ang em tih erawh chu hriat a la nilo. Inbiakna hun tur ruahman chhin hi HPC (D) lam aiawhte hriattirin rem chan tlan ni ruat fel a la ni dawn a ni.

H.Zosangbera kaihhruai HPC (D) nena inbiak chhun-zawmna tur hun tiam tih khawtlai a nih chhan hi Lal-hmingthanga Sanate kaihhruai lam nena inbiakna neih ve tura ruahman a nih vang a ni a. Ruahman dan chuan Lalhmingthanga Sanate pawlte nen hian August thla chawhnu lama inbiakna neih tum a nih laiin, thu delhkilh an rawn siam avangin inbiak tumna hi a tlawlh ta a. Lalhmingthanga Sanate pawl hian inbiakna thu delhkilh atan Hmar hnam puala autonomous district council hrang an ngiat bakah inbiakna hi kilthum atanga neih a, sorkar laipui aiawh tel ve an phut a. Chu chu sorkarin a pawm theih loh avangin inbiakna neih tum hi a tlawlh ta a ni.

HPC (D) hi sawrkar leh khatihlaia rammu HPC te’n kum 1994 a inremna an siam a, HPC mite’n ralthuam an dah hnu lawkah Lalhmingthanga Sanate hian a din thar leh a. An pawl chhungah inkahhai puan chungchanga ngaihdan phir a awm avangin an President ber hi hnawh chhuah a ni a. A lian lam hian an chairman atan H. Zosangbera an thlang ta a ni.

About Editor

C.Lalrochhuanga, New Serchhip, Serchhip - 796181 Mizoram Contact: 8974286711

Leave a Reply

Your email address will not be published. Required fields are marked *