Thih hnua mit pe tawh mi 302

Aizawl Civil Hospital-ah July ni 31, 2008 khan Eye Bank neih a lo ni tawh a, ni 5.9.2017 thlenga thih hnua mit donate (Mit pek tum) in-register tawh mi 4634 awm tawhin, mit dawng tur mit thlak ngai in-register tawh mi 296 an awm a, tun thleng hian thih hnua mit pe tawh chu mi 302 an ni.

Nimin khan Lal Thanhawla Auditoriumah 32nd National Fortnight on Eye Donation programme (25th Aug – 8th Sept,2017) kharna Health Minister Pu Lal Thanzara hovin hman ani a, a mamawh te tana phal taka an mit petu te hnenah appreciation Certificates te hlan nghal a ni.

Eye Bank neih hnu kum 2009 September ni 25 khan Mizorama a hmasa ber atan mit thlak (Corneal Transplant) chu hlawhtling takin Civil Hospital, Aizawl-a Eye Department leh Sri Sankaradeva Nethralaya (SSN) Guwahati nena ṭangkawpa neih a lo nih tawh dan sawiin khuallian Pu Lal Thanzara chuan mahni ramah ngei Organ Transplant (taksa peng thlak) tih theih a lo ni ta chu hmasawnna duhawm tak, mi harsa zawkte tan pawh kawtkaia tih theih mai a nih avangin a lawmawm hle a, Health Department-a Eye Department te hmalakna faktlak a nih thu leh hemi lama mipuite pawh than harh deuh deuh a ṭul thu a sawi.

Eye Donation lam pawhin hma sawnin Eye Donation Centre te pawh District tinah neih thuai a beisei thu te, Mit Donate duh tan pawh kawng a inhawn zau belh zel a rintlat thu Health Minister chuan a sawi bawk.

About Editor

C.Lalrochhuanga, New Serchhip, Serchhip - 796181 Mizoram Contact: 8974286711

Leave a Reply

Your email address will not be published. Required fields are marked *