Freedom from Open Defecation Week hmang

Freedom from Open Defecation @ Serchhip

Nimin zing dar 8 khan PHE Department leh Swachh Bharat Mission (Gramin), Serchhip District te huaihawtin Serchhip-ah ‘Freedom from Open Defecation week’ hman a ni.

He huna khuallian, Pi Sangchhin Chinzah, Serchhip District Bawrhsap chuan thu-sawiin, faina leh thianghlimna chu kan nun pumpuia kan zenghet atana thil ṭul, keini leh kan thlahte thlenga a ṭha zawnga nghawng tam tak nei thei thil a ni, a ti a. Week chu nasa zawka kan inhrilhhriatna, a taka nunpui erawh chu engtik-laipawha kan tih reng tur thil a ni, a ti a, Serchhip District chhung thingtlang lam (Gramin) te ODF a ni fel thei tawh chu lawmawm a tih thu leh, hetiang dinhmun thleng thei tura thawktute beihna fakawm a tih thu sawiin, khawpui chhung (urban) chu ODF-a puan theih a la nih ve loh avangin ṭan lak mek a nih thu sawiin, reiloteah ODF District kan ni thuai dawn a ni, a ti.

Sub Hqrs YMA Serchhip President Pu R.Sanghming-thanga pawhin thusawiin, zun leh êk te hi natna inkaichhawn-na a nih avangin, mipui hriselna tura PHE Department hmalakna a fak a, Serchhip khawpui chu District capital fai ber ni tura ṭan lak a ṭul a ni a ti a, fai chu zahawmna a nih avangin mipui tam dan aṭanga chhûta lehkha thiam tam berna District-ah hian kan taksa kan enkawl uluk ang bawkin kan khawlai enkawl uluk hi kan bat a ni a ti a, he hunah hian Mizorama zaithiam lar Lancy Remlalhruaii’n kalkhawm te zaiin a awi a ni.

He hun kaihruaitu, Er F.Lalsanglura, Sr EE, PHED, Serchhip WATSAN Division chuan Swachh Bharat (Gramin) hmanga Department hmalak dan hrang hrangte tarlangin, thingtlang lam chu ODF a puan fel a nih tawh thu a sawi a, Mizoram pumpui chu kumin October ni 2 hmaa ODF State a puan hman tuma hmalak mek a nih thu leh Swachh Bharat hnuaia hmalakna dangte, tui thianghlim kan hnianghnar theih nana Department hmalak mekna ṭhenkhat te a sawi lang a ni.

He hunah hian Sawrkar official te, Serchhip khawpui chhunga YMA Branch hrang hrang aiawh mi 20 ṭheuh leh Govt. Serchhip College zirlai te bakah tualchhung chanchin-bumite an tel a ni.

Hemi programme ṭan hma hian Freedom from Open Defecation Week pualin Govt Serchhip College zirlai te chuan AOC aṭanga Serchhip Bazar thlengin faina thuziak hrang hrang kengin kawng an zawh a, zingkarah YMA Branch hrang hrangten an huam chhunga bawlhhlawh chharin faina hnatlang an nei bawk a ni.

Nimin zing vek khan Serchhip District chhunga awm E.Lungdar-ah pawh Freedom from Open Defecation Week hi hman a ni bawk.

Freedom from Open Defecation at Serchhip

About Editor

C.Lalrochhuanga,
New Serchhip, Serchhip – 796181
Mizoram
Contact: 8974286711

Leave a Reply

Your email address will not be published. Required fields are marked *