BJP Mizoram hotuten Serchhipa thuthar lakhawmtute an kâwm

BJP Mizoram Pradesh President, Dr. JV. Hluna leh a thawhpuite chuan niminpiah tlai khan Serchhip rawn tlawhin nimin tlai khan BJP Serchhip District President, Pu C.Lalhmunliana In, Serchhip Field Veng-ah tualchhunga thuthar theh darhtute a kâwm.

Thuthar thehdarhtute a kawmnaah hian Dr. JV Hluna chuan August ni 9, 1942-ah Mahatma Gandhi-a kaihhruai-na hnuaiah India chu British lak aṭanga zalenna nei turin ‘Quit India Movement’ kalpui ṭan a nih thu a sawi a, he ni hi Prime Minister, Narendra Modi chuan a ngai pawimawh a, State Capital bak-ah District Hqrs. mipuite chu he ni pual hian ram tana thil ṭha engemawtal ti tura inthiam thar ṭheuh turin a sawm a ni.

Dr. JV Hluna chuan India ramah BJP chuan State 18-ah sawrkarna an siam tawh tih pawh sawiin, rampum zau zawng aṭanga chhutin za zela 70-ah sawrkar an siam thu leh mipui tam zawng aṭanga chhutin za zela 61 vel chu an Party sawrkar-na ah hian an tel tawh thu a sawi bawk.

Tunhnaia Mizoram Quota-a Medical zir tur thlan chung-chang sawiin, Mizoram-a Chak-ma lo awm nghet tawh te chuan Dan lova lolut te chu an ngai thei biklo tih sawiin, an sawrkar chuan Chawngte-ah Police Training Centre dah an tum tih sawiin, “Hetah hian Police Training Mizo tlangval sang chuang zet kan dah ang a, hei hian MZP te hmalakna pawh nasa takin a chhawk zangkhai thei dawn a ni,” a ti.

Chakma bial-a MLA neih chungchanga zawhna chhang-in Dr. JV. Hluna chuan, BJP chuan mi tu pawh, tling ngei tur an Candidate dawn tih a sawi a, tunah hian mi ṭhenkhat chuan Chakma awmna bawr velah BJP chu MLA nei mai thei anga an sawi tawh thu a sawi lang a, Chakma te MLA-a an tlin a, BJP ticket-a Mizo MLA an awm ve leh si loh chuan Mizo leh Mizoram aiawha Central-a thu thlentu tur chu Chakma an ni dawn a ni a ti a, hei vang hian Mizo leh Mizo-ram kan hmangaih a nih chuan Mizoram-ah BJP MLA thlan tlin a pawimawh thu a sawi a.

Mizoram kaltlangin kum 1964-ah Bangladesh aṭangin Chakma te hi an lo lut a, Chakma te hian ram sawi tur an nei lova, Arunachal Pradesh-ah phei chuan tun thlengin Chakma te hi tumah Electoral Roll-a thun an la awm lova, In hmun pek an ni lo a, Citizenship right pawh pek an ni lo, a ti

He hunah hian Serchhip khaw chhung bikah chuan BJP Unit pahnih chauh din a la nih thu an sawi a, mahse Hrang-turzo bial leh thingtlang lamah chuan Unit hi engemawzat an din tawh tih sawiin, Mizoram pumah member nuai khat dawn an neih tawh thu an sawi a, tunah hian BJP chuan Mizoram-ah Unit 400 chuang an neih thu an sawi bawk.

Mara Democratic Front (MDF) te chu BJP-ah an inchhunglut dawn tih a sawi a, he huna tel MDF founder President Pu, PP. Thawla, Ex-MLA chuan May 23-ah MDF Executive Meeting chuan BJP-a inchhunglut tur hian a rel fel tawh thu leh kumin September thlaa National BJP President a rawn zin huna Siaha-a tlawh thei a nih chuan hetah hian MDF te chu BJP-a lawmluh an ni dawn tih a sawi a ni.

Serchhip District-ah District Level-in BJP din a ni a, hruaitu te chu –

President: C.Lalhmunliana, Field Veng

Vice President: 1) KH Rohlua, Bazar

2) Lalrawngbawla, Chhiahtlang

3) R.Ngurbana, Bungtlang

Gen. Secy: Rammawia, Thenzawl

Jt. Secy: Zadingliana, IOC Veng

Treasurer: Lalmuanawma, IOC Veng

About Editor

C.Lalrochhuanga,
New Serchhip, Serchhip – 796181
Mizoram
Contact: 8974286711

Leave a Reply

Your email address will not be published. Required fields are marked *